Footer

Mapukpukaw nga ubing, natuntonan

SALCEDO, Ilocos Sur – Naitunton met laeng ti mapukpukaw nga ubing iti nagannak kenkuana idi Hulio 12, maysa nga aldaw kalpasan ti pannakaipusingna.

Sakbayna, maysa nga Erick Manzano Galang, 30, aglaklako, ken residente iti Barangay Kaliwakiw, Salcedo, ti nakasarak ken ni Bernard Areola, 10, anak da Jun-jun Manadlang ken Lyka Areola, nga agwalang-walang iti barangayda.

Innala ni Manzano ti ubing sa dagus nga inreportna ti insidente ken impaima daytoy iti Salcedo police station a nakikoordinar met iti municipal social welfare development officer iti Salcedo para iti temporario a panaggian ti ubing kadakuada.

Nagturong ni Manadlang, 25, mannalon, ken residente iti Barangay Bulala Leguey, Salcedo iti MSWDO idi agarup alas 3:00 ti malem ti Hulio 12 ket kalpasan a napatalgedan ni Vangie Sidayen, dadaulo ti nasao nga opisina, nga isu ti nagannak, naiyawat kenkuana ti ubing.

Saan a nailanad iti blotter no kasano a napukaw ti ubing.#