Footer

Natalged ti koriente iti probinsia: ISECO

SANTIAGO, Ilocos Sur – Gapu iti agarup dua a lawas a nepnep, naapektaran ti elektrisidad iti sumagmamano a barangay iti probinsia, daytoy ti naammuan manipud ken ni Clarence Ducusin, information officer ti Ilocos Sur Electric Cooperative.

Kinuna ni Ducusin a nagawan ti silaw iti sumagmamano a barangay idiay Magsingal, Narvacan, Vigan ken maysa a barangay iti Galimuyod gapu ta adda dagiti linia ti koriente a natuangan ti kayo, natuang a poste ken bimtak a transformer.

Nupay kasta, iti pakabuklan, natalged ti koriente iti probinsia uray saan a nagsarday ti napigsa a tudo, kinuna ni Ducusin.

Impatalged ni Ducusin a nakasagana dagiti lineman ti ISECO a mapan agtarimaan kadagiti nadadael a linia ket no adda man bumtak a transformer, adda reserba nga isandida tapno maisubli iti apagbiit ti koriente. (Danny Antalan)