Footer

Plastik a Bagas? Peke a Bagas?

Sinursuran: Kolum ni Jobert M. Pacnis
(Umuna a paset)

PEKE a bagas? Plastik a bagas?

Ne, adda, aya, kasta?
Im-imasentayo ti mammigat, mangngaldaw ken mangrabii a di maaw-awan ti innapuy. Uray awan wenno asin la ti masida basta adda la ketdi innapuy, mayaten. Mabalinen ti agbiag, ti mapan agtrabaho nga addaan iti enerhia. Ngem no innapuy ti awan iti lamisaan, uray kasano kaimas ti masida, kasla latta adda kurangna. Di maimas ti mangan. Kurang iti panagrikna. Aglaladutka pay ketdi a di makaipauneg iti innapuy.

Isu nga uray kasano karigat ti panagbiag, ikagumaan latta ti maysa a pamilia ti pannakapaadda ti bagas a maluto para iti panagsasango ti tunggal kameng ti pagtaengan. Yutangan pay no isu ti kasapulan. Ti napateg, makapangan ti pamilia.

Ti makadakes, adda ita daytoy nasaknap a damag nga adda kano peke a bagas. Idiay Matina, Aplaya, Siudad ti Davao nga immuna a rimmuar daytoy nga isyu. Kuna ti pamilia a nakapadas a nagluto ti atapenda a peke a bagas, saan kano nga agbangles ti innapuy uray mano aldawnan daytoy, saan a dumket iti dakulap wenno ramay uray pekkelem ken kammetem, ken agtubbog no kasta a pespesem. Kasla kano styrofoam ti teksturana.

Ne, apayen a kasta, siempre, masaludsodmo la ketdi no sika ti nakapadas kadaytoy. Isu nga inreport a dagus ti nasao a pamilia ti kapadasanda. Naalarma dagiti maseknan nga ahensia ket inadalda a dagus ti nasao a bagas.

Ngem sakbay a bimtak daytoy a damag iti pagilian, addadan naireport a kastoy kadagiti kaduatayo a pagilian iti Abagatan-a-Daya ti Asia. Segun iti report, kaaduan kano a maiwarwaras, mailaklako dagitoy a peke a bagas, a maatap a nagtaud iti pagilian ti China, kadagiti dadakkel ti populasionna a rural areas kas iti India, Inonesia ken Vietnam.

Itay nabiit, maysa a damag ti nagwaras a nastreken ti peke a bagas ti merkado ti Singapore. Ngem kunada met laeng a kaaduan a mailaklako, maiwarwaras dagitoy kadagiti babassit a pagtagilakuan— saan ket a kadagiti mall wenno supermarkets.

Ania ngamin, aya, ti ramen dagitoy peke a bagas?

Segun iti Singapore, dagitoy a plastik a bagas (saan a peke a bagas ti terminoda) ket naaramid manipud iti patatas ken bagas ti kamotit a nalaokan iti synthetic resin sa naporma a kas bagas babaen ti makina.

Nagballaag dagiti eksperto a delikado ti panagipauneg iti plastik a bagas. Makapatay kano wenno mangibati iti nakana a pannakadadael ti digestive system.

Kuna ti Times, dakkel a parikut ti makunkuna a food adulteration. Malagip nga idi 2008 idiay Tsina, immabot iti 300 000 nga indibidual ti naidalit ken 8 nga ubbing ti pimmusay gapu iti food adulteration a napasamak iti produkto a gatas sadiay a nalaokan iti melamine.

Ti food adulteration, isu daytoy ti panakabaliw ti kalidad ti maysa a taraon kas koma iti pannakanayonna iti saan a mayannatup iti salun-at nga additives wenno ania man a ramen a makadakes.

Segun met kadagiti kostumer iti kaarrubatayo a pagilian a nakakitan iti peke a bagas, narigat kano a mailasin daytoy. Kapadpada kan’ latta ti natural a bagas.

Ngem kuna met dagiti lider ken ekspertotaytayo a mailasin daytoy no binsiren a naimbag dagiti bagas. Ti orihinal, saan a nasileng ken agduduma ti kadakkelda idinto a dagiti peke, permi kan’ ti pudawda ken arig agpapadada kadakkel. Ta aramid kano ngarud daytoy ti makina!

(Adda tuloyna)