Footer

Barangay health worker, binagbagsol ti agmauyong

STO. DOMINGO, Ilocos Sur = Dimteng ni patay iti kinatao ti maysa a mauyong a nangbagbagsol iti maysa a barangay health worker idi agsapa ti Septiembre 22 iti uneg ti tiendaan ditoy nga ili a puon ti nakatayann ti biktima.

Pimmusay iti Northside Doctor’s Hospital a nakaitarayanna ni Myrna Flosa y Polca, 61, naasawaan, presidente ti grupo dagiti barangay health workers, ken residente iti Barangay Camestizoan ditoy nga ili gapu kadagiti nadumaduma a sugat a sinagrapna gapu iti panangbagbagsol kenkuana ti maysa a mauyong a lalaki bayat ti kaaddana iti tiendaan publiko a masarakan iti Barangay Vacunero ditoy nga ili idi agarup 7:30 ti bigat ti nadakamat a petsa.

Idi damo, awan pay ti pakabigbigan ti mauyong a lalaki a nangbagbagsol iti biktima ngem idi agangay, naammuan a maysa a Francisco Giray Irinco, taga-La Peria, Laoang, Northern Samar.

Masuspetsa a simmanglad ni Giray ditoy nga ili, sumagmamano pay laeng nga aldaw sakbay ti pammagsol..

Iti panagimbestiga dagiti polis, magmagna ni Flosa iti nagbaetan dagiti puesto iti uneg ti tiendaan idi nasabatna ni Giray a nakaiggem iti imuko nga agatiddog iti sumurok-kumurang a sangapulo a pulgada no mairaman ti pangiggaman.

Mapapati a kellaat lattan a binagbagsol ti mauyong ti biktima nga awan ti probokasion.

Narekobre dagiti polis ti imuko nga inaramat ti mauyong a pinangbagbagsol ken ni Flosa.

Saan pay nga ammo no naggapuan ti imuko a pinangbagsol ni Giray ken ni Flosa.

Nakabalud ita ni Giray idinto a naiyendorson ti kaso a murder maikontra kenkuana iti opisina ti provincial prosecutor, Vigan City, Ilocos Sur.#
S