Footer

Nagtagiarmas a lallaki, nasalamaan agpatpatrolia a polis

SINAIT, Ilocos Sur – Ania ti panggep dagitoy dua a nagtagiarmas a sangsangaili a lallaki a nasalaw dagiti polis a nakatakder iti nasipnget a paset ti igid ti kalsada sadiay Barangay Ricudo ditoy nga ili idi rabii ti Septiembre 22?

Daytoy ti agdama a palpalutpoten dagiti polis kalpasan nga inarestoda da Reymart Yadao y Laeno, 20, baro, mannalon, ken Rolando Yadao, Jr. y Talub, 28, naasawaan, mannalon, agpada a residente iti Barangay La Virgen Milagrosa, Badoc, Ilocos Sur a nasalamaanda nga agtatakder iti abay ti motorsikloda nga imparkingda iti nasipnget a paset ti igid ti kalsada a sakup ti Barangay Ricudo ditoy nga ili idi agarup 10:15 ti rabii ti nadakamat a petsa.

Nagsuspetsa dagiti agpatpatrolia a polis-Sinait no ania ti ar-aramiden dagiti suspek iti dayta a lugar iti rabrabii nangruna idi nakitada nga awan ti plaka ti Kawasaki a motosiklo dagitoy ket binirokda ti dokumento ti motorsiklo ken pakakitaan iti identidad dagiti dua.

Mapapati nga idi dumsaag ni Reymart Yadao iti motorsiklo, nasiputan dagiti polis ti paltog a nakasakbit iti siket daytoy, ket sinitada sada binirok ti lisensiana ken permitna nga agikuyog iti aramas iti ruar ti residensiana.

Inaresto dagiti polis dagiti dua a suspek idi awan ti maipakita ni Yadao a lisensiana sada impan ida iti police station para iti umisu a disposision.#

Comments are closed.