Footer

Shoplifter, imbuking ti CCTV

MAGSINGAL, Ilocos Sur – Nabuking ti dakes nga aramid ti maysa a babai a shoplifter babaen iti closed circuit television camera a naipasdek iti maysa a pagtagilakuan iti tiendaan publiko ditoy a nagtakawanna idi malem ti Septiembre 23.

Nabigbig ti shoplifter a maysa a Mary Ann Tubon y Yadao, 27, naasawaan, ken residente iti Barangay Napo ditoy nga ili.

Saan a nakalibak ni Tubon a nagtakaw iti Jhunweinard Store a kukua ken imatonan ni Winne Liguatan y Villarin, 33, naasawaan, ken residente iti Barangay Bacsil, San Juan, Ilocos Sur gapu ta nairekord iti kamera ti CCTV ti panangkurimesna kadagiti tagilako sana impuslit nga inruar iti pagtagilakuan.

Kas maibatay iti rekord ti CCTV, alas 12:15 ti malem iti nadakamat a petsa idi simrek iti pagtagilakuan ni Tubon, kaduana ti gayyemna a lalaki a maysa nga Agapito Bautista y Mercurio, 53, baro, ken residente iti Barangay Cabaroan, Bantay, Ilocos Sur.

Kabayatan nga adda iti uneg ti pagtagilakuan, kinurimes ni Yadao ti dua a Cojic soap; maysa a Safeguard soap; 12 a cream silk conditioner; 7 pieces Rexona sachet; ken maysa a Likas papaya soap, inkabilna dagitoy iti bagna, sa pimmuslit a pimmanaw iti pagtagilakuan a saan a nagbayad.

Ngem iti panagdardaras ti suspek, nabatina dagiti napateg a dokumento a pakairamanan ti postal ID, voter’s ID, PhilHealth ID, Philippine passport ken resume iti uneg ti pagtagilakuan.

Iti panangrebio ni Liguaton iti rekord ti CCTV, nakitana ti suspek a nagipisok kadagiti tagilako iti bagna.

Babaen ti numero ti selpon a nailanad iti nabati a resume ti suspek, tinawagan ni Liguaton ni Yadao ket impakaammona a nabati daytoy ti pasaportena ken dadduma pay a napateg a dokumentona iti pagtagilakuan.

Idi nagsubli ni Yadao, kinemmeg dagiti empleado sada timmawag iti polis.

Dagus a nagresponde dagiti polis ket impanda ti suspek iti police station para iti pannakaimbestigana.#

Comments are closed.