Footer

1 natay, 5 nadunor iti nagsina nga aksidente iti upland municipalities

BURGOS, Ilocos Sur – Manipud idi simmayaat ti kalsadada, uray iti upland municipalities, gagangay metten a maireport dagiti aksidente a pakainbolbaran dagiti lugan.

Idi Septiembre 27, dua manen nga aksidente ti naireport a napasamak iti national road a sakup ti Burgos ken Suyo, Ilocos Sur.

Iti aksidente sadiay Barangay Lucaban, Burgos idi agarup 3:00 iti bigat ti Septiembre 27, nainbolbar ditoy ti Honda TMX a minaneho ni Ricky Alviar y Bobias, 27, baro, mannalon, awanan lisensia, ken nakasugatanda a tallo a naglulubbon iti motorsiklo a pakairamanan da Ariel Pandico y Biano ken Eric Rosario y Lestino, 24, baro, mannalon, agpapadada amin a residente iti Barangay Luna, Burgos.

Naitaray dagiti biktima iti District Hospital, Narvacan ngem naideklara ni Pandico a dead on arrival.

Iti panagimbestiga dagiti polis, agpaabagatan a direksion ti motorsiklo ket idi makadanonda iti nadakamat a barangay, napukaw ni Alviar ti kontrolna iti manibela a puon ti nakadungparan ti lugan iti alad sana natnag iti kongkreto a drainage canal a nagsagrapan dagiti biktima kadagiti grabe a sugat.

Kabayatanna, tallo a pasahero ti nadunor idi nagdinnungpar ti dua a motorsiklo iti national highway a sakup ti Barangay Poblacion Suyo, idi agarup 5:00 ti malem iti daytoy met la a petsa.

Naitaray iti Tagudin Hospital da Ricardo Paccod y Ambunon, 20, baro, college student ken residente iti Sitio Lub-ong, Poblacion, Suyo, Ilocos Sur; Christopher Giovanni Orpilla y Alambra, 12, Grade 7 pupil iti Saint Augustine’s School, Tagudin, Ilocos Sur, ken residente Barangay Urzadan, Suyo, Ilocos Sur; ken Marites Rosario y Ngangac, 32, naasawaan, public school teacher, ken residente iti Sitio Baudan Brgy Man-atong, Suyo, Ilocos Sur.

Naiyalis ni Orpilla iti Lorma Medical Center sadiay San Fernando City, La Union para iti ad-adda pay a pannakataming dagiti sugatna.

Segun iti report, agsinnabat ti Honda TMX tricycle a minaneho ni Romando Bugtong y Baguitan, 40, baro, residente iti Barangay Urzadan, Suyo, Ilocos Sur, ken ti Euro motorcycle a minaneho ni Vener Saydoen y Gulongan, 25, ALS student, awanan lisensia, ken residente iti Sitio Ida, Barangay Patoc-ao, Suyo, Ilocos Sur ket iti awan a gapu, mapapati a kimmaut ti motorsiklo iti linia ti traysikel a puon ti nakadungparanna iti makannigid a paset ti traysikel ken nakadunoran dagiti pasahero.#NUTRITION:

Comments are closed.