Footer

2 search operations ti kapolisan, positibo iti paltog iti maysa a balay

STA. MARIA, Ilocos Sur – Nupay negatibo ti resulta ti search operation ti kapolisan iti maysa a balay, nakakumpiskada iti armas ken balbala iti sabali a balay a nangiwayatanda iti panagsukisok idi agsapa ti Septiembre 25.

Babaen ti bileg ti Search Warrant Nos. 21 ken 22, seriesn of 2015 nga inyisio ni Judge Marita B. Balloguing ti Regional Trial Court, Branch 20, Vigan City, a napetsaan iti Septiembre 24, 2015, naggiddan a sinukisok dagiti police elements a pakaibilangan ti Sta. Maria police station, Highways Patrol Group, Maritime Group ken CIDG Ilocos Sur Team ti balay ni Herbert Dandin y Ilacad a masarakan iti Barangay Poblacion Sur, Sta. Maria ken ti balay ni Samuel Dagdagan y Bajet a masarakan iti Barangay Poblacion Norte, Sta. Maria.

Negatibo ti resulta ti panagsukisok iti balay ni Dandin ngem nagpositibo ti search operation iti balay ni Dagdagan.

Nakakumpiska dagiti polis iti balay ni Dagdagan iti maysa a Colt AR M16 baby armalite rifle nga addaan Serial No. RP17488877; 3 long magazine assembly para armalite rifle; 8 short magazine assembly para armalite rifle; 12 naiputok a cartridge cases para Cal. 45; maysa a bandolier; ken twenty 21 bala para Cal 5.56.

Awan ni Dagdagan idi masukisok ti balayna ngem sinaksian dagiti barangay officials.
Naipan dagiti nakumpiska nga items iti CIDG Ilocos Sur Team Office, Bulag, Bantay, Ilocos Sur.

Iti pannakaisurat daytoy, maisagsagana ti kaso a panaglabsing iti RA 10591 maikontra ken ni Dagdagan.#

Comments are closed.