Footer

Empleado ti fast food chain, pinaltogan ti tanod

CANDON CITY – Dua ti naisayangkat a pammaltog ditoy siudad iti las-ud ti tallo nga aldaw a nakayospitalan ti maysa nga empleado iti fast food chain ken maysa a Muslim nga aglaklako.

Idi agarup 11:15 ti rabii ti Septiembre 26, napaltogan ni Alejandro Javier y de Guzman, 33, baro, empleado iti Chowking Candon Branch, taga-Barangay Parparia, Narvacan, Ilocos Sur ngem agnaeden iti Barangay San Antonio, Candon City.

Iti inisial a panagpalutpot dagiti polis, aggawiden ti biktima manipud iti pagtrabahuanna iti dayta a rabii ket idi makadanon iti 25 de Marzo Street, Barangay San Antonio, pinaltogan ni Daniel Cortez y Alay-ay, 45, balo, chief tanod, ken residente iti Barangay Villarica, Candon City a nagsagrapanna iti dunor iti likud.

Intaray dagiti immarayat a tattao ni Javier iti St. Martin de Porres Hospital para iti pannakaagasna idinto a naglibas ni Cortez.

Idi agarup alas 2:00 ti bigat ti Septiembre 27, inaresto dagiti polis ti suspek iti balayna ken nakumpiskada kenkuana ti maysa a home made cal. 45 a mapapati nga inaramatna a pinangpaltog ken ni Javier.

Nakadetene ti suspek iti police station idinto nga itultuloy dagiti inbestigador ti panagpalutpotda no ania ti motibo ti pammaltog.

Kabayatanna, mapapati a saan a nagustuan ti suspek ti panangkusilap ti biktima kenkuana ket pinaltoganna daytoy iti sanguanan ti maysa a panganan sadiay Barangay San Jose, Candon City.

Intaray ti pamiliana ni Muhammar Samporna y Sarip, 21, baro, aglaklako, ken residente iti nadakamat a barangay, iti Resonable Hospital, Candon City para iti pannakagas ti sugatna iti likud, makannigid a tammudo ken index finger.

Sakbayna, napan gimmatang iti fishball iti Reylyn’s Carinderia ni Samporna ken ni Basari Sarif y Faisan, 26, baro, natibo iti Marawi city, Lanao del Sur, ket agdama a residente iti Barangay San Jose, Candon City idinto nga adda nga aggiinom ti suspek ken dua a kakaduana iti uneg ti panganan.

Segun iti report, nagsabat ti dua a grupo iti sango ti karinderia ket mapapati a nagkinnusilapda a puon ti kellaat a nangasutan ti di nabigbig a suspek iti paltogna sana pinaltogan iti namitlo a beses ni Samporna.

Naglibas ti suspek a naglugan iti di nabigbig a traysikel idinto a naglugan dagiti kakaduana iti nangisit a Honda TMX sada nagpadaya a direksion.

Nakarekobre dagiti inbestigador iti nakapasamakan ti pammaltog iti tallo a kapsula a mapapati a naggapu iti cal. 45.#

Comments are closed.