Footer

Sakbay nga Agtabon ti Initko

Ababa a Nobela ni Jobert M. Pacnis
(Maikasiam a paset)

Nangsukatak nga immuna iti lambanog. Sinaggaysak ida a minatmatan. “Kakabsatko ida,” kinunak, “tulongandak kadi met laeng no bilang ta awatek ti karit?”

“Ket wen, a, kasinsin!” indanog ni Kasinsin Badol iti dakulapna.

“Namnamaem, barok,” timek ni Tata Ikko. “Ammomi ti kinarikut ti trabaho ti maysa a reporter aglalo la unayen no maysan a komentarista. Saan a basta kinaritdaka lattan.

Karaip dayta ti panangtedmi iti suporta ken tulong kenka.”

Napayamanak. Imbagak ti desisionko.

“Ayos!” uray la nga nagiinnapirda.

“Itosantayo ngarud, kakalugaran!” kinuna ni Manong Atong.

Ket pinagtitinnik-olmi ti dudua a baso. Nakaragragsakda man la unay. Kasda la nakangngeg iti banag a mangitag-ayen iti panagbiagda. Ket naikarik a diakto ida paayen.

“Kikki,” kinuna ni Angkel Angkuan, “yegmo ditoyen ‘ta sangakonteyner nga arak ta agrambakkami man!”

“No dika pay nakabaybayad iti nakaat-atiddogen a listaam!” immisugsog kenkuana ni Nana Kikki. “Sa ita, panayonam manen?”

Nagallangugang ti katkatawami.

“Agbayadakto, a, no tumamaak iti hueteng!”

“Kaanonto pay? Dayta a kinamalasmo nga agtaytaya…”

Ad-addan ti katawami.

“Ala, nana,” kinunak, “yegmo ditoyen ta siak ti makaammo.”

“Dayta man, kasinsin!” inyisem ni Kasinsin Charlie. “Adu la ketdi ita ti mabaut ‘diay balbalayda.”

Awanen ti arindinggan iti katkatawami.

DUA bulanen a field reporterak iti DZJP. Dagiti ili iti maikadua a distrito a paka-ibilangan ti Cabaybay ti sakupko.

Panagriknak, mayat met ti annayas ti amin. Minalem nga agawidak iti balay ta agarup maysa oras laeng a motorek manipud estasion. Sabado ti free day-k. Kadaytoy met nga aldaw a sanguek dagiti immulak a kayo iti bangkag. Iti Domingo, saanen a masapul nga agparangak iti opisina. Agreportak lattan iti mamitlo— umuna iti Umas-asuk a Damag iti alas singko iti agsapa; maikadua iti Noontime News ken maikatlo iti Balita sa Nagdaang Linggo.

Kuna ni Station Manager Raquel Fabita nga iti mabiit pagiggemennakon iti programa. Diak kanon a bagay ti field reporter laeng. Nagyamanak. At last…

Ngem isu met ti nakalidayan ni nanang.

“Am-ammokan, barok,” kinunana. “No adda makitam nga iregularidad, basta imetmo dagiti ebidensia, saankanto nga agsardeng. Manen, adu la ketdi dagiti mapasakitam. Ket dayta ita ti pagam-amkak.”

“Nanang, paset ti trabahok ti peggad,” kinunak. “Sa maysa, manangngaasi ti Apo. Dakayo met laeng ti nagkuna a diak a mangliplipat Kenkuana. Ammok a dinakto baybay-an ta dina kayat nga agsaknap wenno agari ti kinadakes.”

“Ala, awanen ti maibagak pay no di ti panagan-annadmo a kanayon, barok.”

Idi met maammuan dagiti kalugarak, napalalo a ragsakda.

“Maipamaysamton ti agbanat, barok!” kinuna ni Tata Pistong. Addakami manen iti kantina ni Nana Kikki.

Immisemak laeng.

“Kas nakunami idi, barok,” ni Tata Ikko, “kanayonkami iti likudam.”

NAKAAWATAK iti surat kadayta nga aldaw. Awan ti nakailanad a nagtaudanna.
Agmakabulanen ti programak a TI KINAPUDNO tunggal alas otso iti agsapa, Lunes agingga iti Biernes. Matratar ditoy dagiti nadumaduma nga anggulo dagiti damdamag tapno maiparang ti kinapudno. Daytay maala ti side ti agsupadi a partido.

Binasak ti surat.

Rilo,

Dika aginlalaing. Tantanangem dagiti garawmo. No agbiddutka, kasaritam dagiti buli!
Nupay nadudogen ti bagik kadagiti kakastoy, binangonannak latta iti aliaw. Aggargarawak ita iti bukodko a probinsia ngem kasla ganggannaetak ta adu pay laeng ti diak ammo— ket dayta ti medio pagdandanagak. Ngem kas nakunakon, trabahok daytoy. Rumbeng a takderak. No ania ti pudno, isu laeng ti pagbatayak.

Tapno saannak unay a maapektaran, inisemak lattan ti surat. Siak ketdin ti butbutngenda?

Kinunesko ti surat.

“’Kinsurat dayta, barok?” diak nadlawan ni nanang a simrek iti salas.

“Awan, ‘nang,” natarantaak.

“’Nia nga awan no nakitak ti panagrissik dagiti matam? Kitaek man…” ket pinanggepna nga alaen ti surat.

“Awan daytoy, ‘nang. Aramid laeng dagiti awan ti maobrana.”

“Agipangpangta, kasta kadi?”

“Wen, ‘nang,” inaklonko.

“Pordios!” Nanguros. “Daytoyen ‘di kunkunak. No kissayam koma ngamin ti panagkritkritikarmo, barok?”

“Nanang?”

“Mabalin met a positibo dagiti ikomentariom. Maiyadayoka la ngaruden iti peggad, umadu pay dagiti gagayyemmo.”

“Kunak man no maawa-tanyo ti trabahok, ‘nang?”

“Addaakon dita, barok. Ngem siak ti umuna a matay no kasta laeng dagiti maaw-awatmo iti inaldaw.”

“Mamin-ano kadi pay nga ibagak, ‘nang, a didak pakadanagan. No talaga a gasatkon, awan ti mabalintayo. Ngem no naituding nga agserbiak pay kadagiti kailiantayo, uray pay maipasungalngalak kadagiti kapepeggadan a situasion, malasatakto latta.”

“Wen, a, ngem…”

“Sinapataak daytoy a trabaho, ‘nang. Ket kayatko nga akmen a kas mayannatup iti konsensiak. Iti kasta, awanto ti pakababalawak. Adu dagiti umili a mangnamnama kaniak; dagiti umili a nakasagana a mangtulong kaniak.”

“Matulongandaka ngata no agpeggaden ti biagmo?”

Napaumelak. Ta ania ti sawek?

(Maituloyto)