Footer

Baro, binagsol ti kasinsinna

SINAIT, Ilocos Sur – Uray agkasinsin, agpinnatay no nakullaapanen ti panunot gapu iti arak.

Binagsol ni Marwin Macugay y Yago, 27, baro, residente iti Barangay Sta. Cruz ditoy nga ili, ti kasinsinna a ni Michael Macugay y Yagin, 30, baro, kalugaranna met laeng, gapu iti panagsubangda bayat ti panaggiinomda iti balay ti suspek idi parbangon ti Oktubre 5.

Mapapati nga imballaag ni Michael a paltoganna ni Marwin idi kapudot ti panagsubangda ket namindua a binagsol ti suspek ti kasinsinna a nakasugatan ti tian ken makannigid a takiag daytoy.

Naitaray ni Michael iti Sto. Cristo Milagroso Hospital, Sinait sa naiyalis iti Mariano Marcos Hospital and Medical Center, Batac City, Ilocos Norte idinto a boluntario a simmuko ti suspek ken ni Barangay Captain Ricardo de Guzman Vinluan.

Narekobre iti crime scene ti maysa a cal. 38 Smith and Wesson revolver a nagkarga iti maysa a bala ngem awan a nasarakan dagiti polis ti patadem a naaramat iti pammagsol.#

Comments are closed.