Footer

Lalaki, imbukingna ti bagina nga agikut iti kolorum a paltog

CANDON CITY – Adda dagiti nangdayaw iti daytoy a lalaki agsipud ta managtungpal iti linteg. Ngem ad-adu dagiti nangkatawa kenkuana gapu ta iti kinamanagtungpalna iti linteg, imbukingna laeng ti kinaignorantena iti linteg a puon ti posible a pakakasuanna.

Iti report manipud iti Candon City police station, maysa a lalaki nga idi agangay ket naammuan nga agnagan iti Alvin Disomimba y Maca-ayong, 39, naasawaan, resi-dente iti Barangay Maynganay Norte, Sta. Maria, Ilocos Sur ti nangi-deposito iti maysa a bag a naglaon iti paltog iti security guard ti korte a ni Basilio G. Allagones, 54, naasawaan, ken residente iti Barangay Sucoc, Narvacan, Ilocos Sur.

Pagannurotan iti regional trial courts ditoy a maideposito dagiti armas dagiti agatendar iti hearing iti korte.

Segun iti guardia, awan ti impakita ni Disomimba a dokumento idi indepositona ti nasao a paltog a maysa a caliber 22 revolver.

Nairana nga adda ineskortan dagiti polis-Candon a balud a mahuisio iti korte iti dayta nga aldaw ket impakaammo kadakuada ni Allagones maipapan ti naideposito a paltog nga awanan iti doku-mento.

Idi mapan sublien ni Disomimba ti indepositona a bag, nasaludsod manen kenkuana dagiti dokumento ti nasao a paltog ket idi awan ti maipakitana, inareston dagiti polis.

Impaima ni Allagones kadagiti polis ti caliber 22 a paltog nga awanan iti marka ken serial number a nagkarga iti lima a bala ken sabali pay a lima a bala para iti nasao a kalibre.

Impan dagiti polis ni Disomimba iti police station agraman dagiti nakumpiskada a paltog ken balbala.

Maisagsagana metten ti pannakaipila ti maikanatad a charges maikontra kenkuana.

Posible met nga agbabbabawi itan ni Disomimba no apay nga indepositona ti paltogna kas panagtungpalna iti pagannurotan ti korte idinto a kolorum daytoy.#

Comments are closed.