Footer

Nabartek a lalaki, kinaritna a kaboksing dagiti polis

BANTAY, Ilocos Sur – Panangipagarup siguro daytoy a lalaki, kas kalaing ni Pacquiao isu a kinaritna a kaboksing dagiti polis a naganawa iti panagprobokarna sadiay Barangay Guimod, ditoy nga ili idi rabii ti Oktubre 8.
“Tulpakenkayonto pay nga saggaysa, ikkatenyo ta paltogyo ta agbobogsingtayo no kayayo met laeng,” kastoy ti mapapati nga imbalikas ni Romualdo Pulido y Monzon, 28, naasawaan, ken residente iti Barangay Guimod kadagiti polis a nanganawa kenkuana ken nangipan kenkuana iti Gabriela Silang General Hospital para iti medico legal examination.

Nagresponde dagiti polis ket nagturongda iti Barangay Guimod kalpasan a nakaawatda iti report manipud iti maysa a residente idi agarup alas 9:00 ti rabii ti nadakamat a petsa nga agprobprobokar ni Pulido iti barangayda.

Inanawa dagiti polis ni Pulido nga adda iti inpluensia ti arak ngem mapapati nga arogante ti suspek iti pannakipatangna kadagiti pannakabagi ti linteg.

Nupay kasta, nagtalinaed dagiti polis a kalmante iti baet ti panangbasbassawang kadakuada ni Pulido uray idi nakalugandan iti patrol car nga agturong iti Gabriela Silang General Hospital para iti medico legal examination ti suspek.

Ngem idi makadanon dagiti polis ken ti suspek iti ospital ket bayat ti ididissaagda, kellaat a dinisnog ni Pulido ti rupa ni PO1 Gerome Querol Arquelada.

Iti pannakaisurat daytoy, maisagsaganan ti kaso ni Pulido a direct assault on a person in authority.#

Comments are closed.