Footer

Sakbay nga Agtabon ti Initko

Ababa a Nobela ni Jobert M. Pacnis
(Maika-10 a paset)

MALABSAK ti tsekpoint iti iseserrekko iti ilimi kadayta a panaggapuk iti estasion ti radio. Masmasdaawak ta inamparanak ti maysa a kagawad kadayta a barangay, kaduana dagiti polis. Malasindakon nupay nakahelmetak ta inaldaw a magnaak ditoy. Awan met sabali a sumrekan iti ili nga agturong iti barangaymi.

Impaigidko ti motorsiklok. Inikkatko ti helmetko kalpasan a naiddepko ti makina. Inasitgannak dagiti polis ken ti kagawad.

“Apay, sir?” inamadko.

“Mapanka kan’ ken ni mayor, sir. Kaitawtawagna itay madama ti sessionmi,” ti kagawad ti simmungbat. “Adda kan’ napateg a pagsaritaanyo. Imbaonnak ni Kapitan Senalop tapno sabtenka ditoy,” kinunana pay.

“Dayta laeng, apo?”

“Wen,” ti maysa kadagiti polis ti simmungbat. “Agsaganaka ita.”

Agsagana? Ta apay?

Ania metten ni Noel! Insaed pay ketdin ti panangpaayabna kaniak. Dinak latta koman pinasukon idiay balay. No saan, tinawagannak koma iti selponko. Ammok nga ammona ti numerok ta kanayonko met nga iwarwaragawag iti programak ta sindadaanak a mangsungbat kadagiti agkasapulan iti tulong.

Insuotko ti helmetko. Pinagandarko ti motorsiklok ket insiwetkon ti nangpanurnor iti haywey a nangbeltak kadagiti nalawa a kataltalonan nga agtunged iti sentro. Nabang-i ti yar-arakup ti pul-oy gapu ta katibok ti panagani.

Apay ngata a papaayabannak ni Noel? Awan met ketdi ti ammok a rason no di dagiti komentariok iti programak. Nasilian? Ngem pudno man met dagiti sasawek. Agdadata ti kinapudno. Paneknekan dayta dagiti umili!

Nasaknap ti panagbungbong iti sibubukel a Cabaybay, saan laeng nga iti barangaymi. Napugipogen dagiti kabambantayan iti abagatan. Agraraira ti illegal a sugal a hueteng. Umad-adu dagiti adik. Kasta met dagiti biktimada.

Saanko laeng a parparbo dagitoy a damag. Bulsek laengen dagiti agkuna nga awan dagita a mapaspasamak.

Ita, kas katinggaw ti mailig-is a kuto ti damag nga iti mabiit, maminasen ti aplaya a pakaalaan dagiti nangisit a darat wenno magnetite. Aprobado kanon daytoy idinto nga awan met ti naaramid a consultation meeting wenno public hearing. No agbanag a kasta, anianto pay ti mapasamak dagiti pantok a saripda dagiti agindeg? Saan ng adayo a lamuten ida dagiti dalluyon. Baka dumtengto ti panawen a maunas iti mapa dagiti walo a barangay a nayintar iti aplaya.

Imparkingko ti motorsiklok iti sirok ti bittaog iti dayaen ti munisipio. Inuksobko ti tselekok a namarkaan iti MEDIA ket impanko iti uneg ti bag. Nagturongak iti maikadua a kadsaaran ti munisipio. Simrekak iti kuarto a nakaimalditan ti MAYOR’S OFFICE. Ti sekretaria ti nangilukat.

“Adda ni mayor, ading?” inamadko.

“Adda dita, sir,” insungona ti ridaw iti kannigid. “Ania kadi ti naganyo ta ibagak nga addakayo?” Inseniasna ti panagtugawko.

Inyam-ammok ti bagik. Nagyamanak.

“Ay, dakayo gayam, sir,” inyisem ti sekretaria nga apagsagpat la ngata a tallopulona. “Itay pay nga ur-urayennakayo ni mayor.”

“Kasta kadi?”

“Wen, sir.” Tinuktokna ti ridaw. “Addan ti ur-urayenyo, mayor,” kinunana idi mailukatna iti apagbingngi ti ridaw.

Inseniasna ti iseserrekko kalpasanna.

“Naimbag nga orasmo, mayor,” indaydayawko apaman a nakastrekak.

“Kasta met, classmate,” kinunana. Nagdinnakulapkami. Inseniasna ti panagtugawko kalpasanna. Uray la naganit-it ti swivel chair-na idi agtugaw.

Nagyamanak.

Daytoyen ni Noel? Agkatayagkami ngem bussot. Padakon a sumilap ti tuktokna. Nalitem dagiti kukona, nalabit gapu iti panagsigsigariliona a bisionan manipud pay idi haiskulkami; nakarabraber ti apsay a buokna ken dina man la kinartian dagiti sangapulgadan san a barbasna. Adda pay laeng daydi panagkakaingasda ken Jestoni Alarcon.

Nalawag ti naibuddak a naganna iti rabaw ti lamisaan: NOEL ALVABES, Managserbi nga Ama-ti-Ili. Napaisemak. Dinayawna metten ti bukodna a bagi.

Napnapno iti ladawan ti bulletin board iti diding. Kaaduanna kadagitoy a kaduana dagiti nangangato nga opisial iti probinsia. Ngem awan man laeng ti makitak a ladawan dagiti proyektona koma. Addada pay programa iti graduation, kasar, buniag ken natayan. Ipakitana a nalaka laeng nga as-asitgan dagiti umili? Manen, napaisem ti unegko.

“Pinaayabandak kano, mayor,” binurakko ti ulimek ta diak met laengen mauray nga agsao. Sangkakitanak met lattan.

“Classmate,” kinunana, “dayawenka ta natungpalmo ti arapaapmo. Agtamedak kenka.”

“Agyamanak, mayor…”

“Noel… wenno classmate… wenno batch kadi lattan,” inyisemna.

“S-sige, batch…”

“Kadagupan iti batch-tayo, sikan sa laeng ti nakatungpal iti arapaapna. Kinitak dayta iti daydi souvenir programtayo.”

Agbalin a reporter wenno mannurat ti nailanad idi iti baba ti ladawanko a kayatko a pagbalinan. Adu kadagiti kaklasemi ti nagkuna a kayatna ti agbalin nga abogado, inheniero, doktor, mannursuro, soldado, polis ken dadduma pay. Ngem iti kinaagpaysuanna, dagiti nagkuna a mayat nga agabogado, nagbalin a titser; daydi ag-inhiniero, nagtinnag a nurse; dagiti mayat nga agtitser, nasapada a nagabrod a nakabanniitanda metten kadagiti ganggannaet a negosiante nga assawada. Malagipko pay, siak la nga agpayso ti nangilanad iti souvenir a kayatko ti sumrek iti media.

“Pagyamanak ta pinatgam ti awisko,” naalumamay ti panagsaona.

“Apay kadi, batch?” sinaludsodko. Ti ammok, kapungtotnak. Ta di kad’ kuna itay ‘diay polis nga agsaganaak?

(Maituloyto)

 

Comments are closed.