Footer

3 prangkisa ti traysikel, nakansela

VIGAN CITY – Tallo a traysikel ti saanen a makapagpasada ditoy siudad agsipud ta nawaswasen ti prangkisa ti operator wenno akinkukua.

Kinuna ni Konsehal George Villanueva, chairman iti committee on transportation, a naibabawi ti prangkisa ti traysikel ti tallo nga operators gapu iti panaglabsingda iti namitlo a daras iti makatawen ti paglintegan ti trapiko ditoy siudad.

Nakansela ti prangkisa ti tricycle No. B-179 a kukua ni Reynaldo Sotelo, Tricycle No. B-455 a kukua ni Redento Obrero, ken ti Tricycle No. 492 a kukua ni Rufina de la Cruz, kinuna ni Villanueva.

Impalagip ti konsehal a maysa a pribiliheo ti maikkan iti prangkisa, isu a rumbeng laeng a saluadan babaen iti agtultuloy a panagtungpal kadagiti paglintegan iti siudad.

Indagadag ti konsehal ti panangireport ti riding public dagiti agpaspasada nga aglabsing iti traffic ordinances tapno mairekord dagitoy. No maireport a naglabsing ti maysa nga agpaspasada iti namitlo a beses iti las-ud ti makatawen, addan pagbatayan a makansela ti prangkisa ti traysikel.#

Comments are closed.