Footer

2 kameng ti Budol-Budol Gang, nangbiktiman iti napalabas

VIGAN CITY – Mapukpukaw ti nangina a relo ti maysa a prominente a negosiante ditoy a biniktima ti Budol-Budol Gang idi Enero 6.

Naipiskot dagiti suspek sadiay Barangay San Agustin kalpasan a kinamat ida dagiti police-Candon idi ginandatda ti aglibas iti checkpoint nga impasdek dagiti pannakabagi ti linteg iti sango ti Bagani Campo Cemetery a dandani nakaatalan ti dua a polis.

Narekobre dagiti polis ti P10,000.00 a kuarta ken ti P200,000.00 ti balorna a kuentas ni Mariano Co y Chan, 83, naasawaan, negosiante ken residente iti Brgy Pantay Daya, Vigan City, Ilocos Sur ngem awan ti relona nga aggatad iti P300,000.00 iti ummong dagiti dadduma pay a relo a mapapati a kukua dagiti immuna a nabiktima ti grupo.

Mapapati a naipakni ti maysa kadagiti suspek a pakairamanan ti tallo a babai ken dua a lalaki ti relo ni Chan  sakbay a natiliwda iti Barangay San Agustin, Candon City kalpasan a kinamat ida dagiti polis bayat ti panaglibasda manipud iti checkpoint a nangsaedan dagiti polis kadakuada.

Pinaglibakan dagiti suspek nga adda relo a pinorsarda nga innala manipud ken ni Chan.

Ngem kinuna ni Vigan City COP Jugith Del Prado a nainbolbaren ti grupo iti kaso ti Budol-Budol iti napalabas.

Kinuna ni Del Prado a karaman da Raquel Dela Cruz y Rimando, 37, naasawaan, ken residente iti Brgy. Tibong, San Fabian, Pangasinan, ken Glorie May Rimando y Genese, 25, awanan asawa, ken residente iti  Sitio Bolo, Brgy. Pandan, Alaminos, Pangasinan, iti Budol-Budol Gang a nangbiktima iti maysa a baket a retirado nga empleada iti gobierno a taga-Tagudin ket naalaanda daytoy iti kuarta ken alahas.

Maipalagip a biniktima ti Budol-Budol Gang a pakaibilangan da Dela Cruz ken ni Rimando ni Delia Cablayan Dauz, 74, naasawaan,  ken residente iti Barangay Becquez, Tagudin, Ilocos Sur idi Enero 9, 2015.

Nagpammarang ti grupo a negosiante ket ginayyemda ni Dauz ket inallukoyda daytoy a makisosio iti negosioda.

Manipud iti San Fernando City, kinuyog ti grupo ti baket agingga iti balayda sadiay Tagudin, Ilocos Sur a nangalaanna iti kuentas ken wedding ringna. Nangiyaon pay ti baket iti kuartana nga agdagup iti P400,000.00 iti maysa a bangko iti Candon City.

Nupay kasta, naapput dagiti suspek iti checkpoint nga impasdek dagiti polis-Sudipen apaman a nakaawatda iti flash alarm manipud iti polis-Candon para iti pannakasaed ti lugan dagiti suspek a nangbiktima iti baket.

Napasubli met ti negosiante ti kuarta ken alahasna.#

Comments are closed.