Footer

Anian a kinabarayuboy a panaggasto tapno laeng mangabakda iti pagtarayanda a puesto!

Mangrugi pay laeng ti campaign period inton Pebrero 9 agingga inton Mayo 7 ngem saankamin a masdaaw iti nairakurak kadagiti warnakan, radio ken telebision a ginasut a millionen ti nagastos dagiti kandidato para iti kinapresidente, bise presidente, ken senador iti anunsio iti telebision iti 2015?\.

Adda iti botante no patienna daytoy ngem iti monitoring nga insayangkat ti Nielsen Philippines, nakagastosen dagiti uppat a kandidato para iti kinapresidente iti agarup P1.6 billion iti anunsio laeng iti telebision!

Segun iti nasao a media research firm, kadakkelan ti nagasto ni UNA presidential candidate Jejomar C. Binay, maikadua ni Senador Grace Poe, maikatlo ni dati a Senador ken DILG Secretary Manuel Roxas III, sa ni Davao City Mayor Rodrigo Duterte.

Manipud Enero 1, 2015 agingga iti Nobiembre 30, 2015, nakagasto kuno ni Binay iti P595,713,000 para iti TV ads; P448,166,000 ken ni Poe; P424,870,000 ken ni Roxas; ken P115,423,000 ken ni Duterte iti baet nga isu ti kaudian a timmapog a kandidato para iti kinapresidente.

Kadagiti kandidato iti para bise presidente, kadakkelan iti gastos iti TV ads ni Senador Alan Peter Cayetano nga agdagup iti P398,288,000; simmaruno ni Senador Ferdinand Marcos, Jr. a nakagasto iti P103,429.00; maikatlo ni Leni Robredo – P91,602,000; maikapat ni Senador Gregorio Honasan – P43,580,000.

Ngem daytoy ti nakapappati: nakagasto laeng ti katiket ni Poe a ni Senador Francis Escudero iti P30,000.00!

Iti met biang dagiti sumagmamano a kandidato para senador, agdagupen iti  P310,763,000. ti gastos ni Congressman ti Leyte Martin Romualdez iti TV ads; dati a Metropolitan Manila Development Authority chairman Francis Tolentino  -P144,112,000; Manila Vice Mayor Isko Moreno – P89,758,000; dati a Senador Panfilo Lacson – P86,341,000; dati a Justice Secretary Leila de Lima – P54,499,000; dati nga Energy Secretary Jericho Petilla – P52,284,000; dati a hepe ti Technical Education and Skills Development Authority Joel Villanueva – P40,518,000; Sen. Serge Osmeña – P21,990,000; dati nga Akbayan Partylist Representative Risa Hontiveros – P20,287,000; Bayan Muna Representative Neri Colmenares – P4,363,000. Kabassitan ti nagastos ni broadcaster Rey Langit – P405,000.

Saan a nailanad iti monitoring ti Nielsen Philippines no mano ti nagastos dagiti dadduma pay a kandidato para senador a kas kada Sen. Teofisto Guingona III;  Diputado iti Pasig City Roman Romulo ken Diputado ti Sarangani Manny Pacquiao.

Kas ninamnama, pinaglibakan ti kampo ni Binay a kasta kaadu ti nagastosda iti television ads. Uray ni Poe, saanna a patien a kasta kadakkel ti nagastosna ket inkarina a pakita ti accounts nga imposte ti kampona tapno maammuanna no kasano a kasta kadakkel ti nagastosna. Iti met biang ti kampo ni Roxas, imbaskagna a kabassitan ti nagastos ti kandidatoda sa impasingkedda a letihimo ti nagtaudan ti pondo agsipud ta nagserbi ni Roxas iti gobierno iti nabayag ken awan a pulos ti insinuasion a nagibulsa iti kuarta ti gobierno.

Kadatayo a marigrigat nga umili, pamrayantayo laengen nga amusayen ti subsobtayo iti daytoy a kinabarayuboy dagiti kandidato para iti nasional a puesto. Ngem ania ngarud ket awan ti linteg a mangiparit iti nasapa unay a panagkampania ken saan nga iparit ti linteg dagiti kandidato nga aganunsio sakbay ti panangrugi iti opisial a panagkampania. Kasano a nagbalin a kasta ti linteg? Ania ngarud ta dagiti mararaem nga agilinlintegtayo ti mismo a nangaramid iti linteg! Kadagiti mararaem nga agilinlintegtayo, uray kasano kalinteg a linteg, mapagbalinda a letteg no pagimbaganda ti masagid!

Ngem uray kasano ti panangibando ken panangikalintegan dagiti madayawdayaw a kandidato a lehitimo ti nagtaudan ken saan a naggapu iti bulsada dagiti kuarta a ginastosda, saludsodentayo: saanda la kadin a maalumiim wenno mabain nga aggasto iti kasta a kantidad idinto a riniwriw dagiti aglangan payen a mangan iti inaldaw gapu iti di maalut-ot a kinakurapay?

Ngem adda kadi pay nabatbati a bain dagiti agtuturaytayo? Sika la ti makasungbat iti dayta, kaka!#

Comments are closed.