Footer

BANNER: Budol-Budol Gang a nanghold-ap iti lakay a negosiante, naipiskot dagiti polis sadiay Candon City

CANDON CITY – Saan a sinardengan a kinamat dagiti polis ditoy dagiti kameng ti Budol-Budol Gang a nangbiktima iti prominente a negosiante iti Siudad ti Vigan agingga a naipiskotda dagitoy sadiay Barangay San Agustin ditoy idi malem ti Enero 6.

Napasamak ti kinnamat dagiti lugan idi ginandat ti drayber ti Mitsubishi Lancer ti aglibas a dandani nakaatalanna iti dua a polis a nangpara iti sasakayan iti checkpoint nga impasdekda iti sango ti Bagani Campo Cemetery.

Sakbayna, nangipatulod ti polis-Vigan iti flash alarm kadagiti amin a police stations a madalanan dagiti suspek apaman a naireport kadakuada ti panangbiktima ti Budol-Budol Gang ken ni Mariano Co Chan, 83, naasawaan, negosiante ken residente iti Brgy Pantay Daya, Vigan City, Ilocos Sur.

Positibo a binigbig ni Chan dagiti nangbiktima kenkuana a da  Michael Dacanay y Javines, 39, naasawaan, drayber iti Mitsubishi Lancer a getaway car,  ken residente iti Brgy. Tiblong, San Fabian, Pangasinan; Carlos Pingol y Madrid, 58, naasawaan, electrician, ken residente iti  Brgy. Maristel, Limay, Bataan; Consolacion Santos y Ponce, 64, balo, ken residente iti  Brgy. Tayabas, Tondo, Manila; Raquel Dela Cruz y Rimando, 37, naasawaan, ken residente iti Brgy. Tibong, San Fabian, Pangasinan, ken Glorie May Rimando y Genese, 25, awanan asawa, ken residente iti  Sitio Bolo, Brgy. Pandan, Alaminos, Pangasinan.

Kas maibatay iti police blotter ti Vigan, idi agarup 1:55 ti malem ti Enero 6, agtaktakder ni Chan iti sanguanan ti kukuada a Felmar Furniture a masarakan iti Quezon Avenue, Barangay 3, Vigan City idi inasitgan dagiti suspek a nangiyam-ammo iti bagida a nabayagen a gayyemda.

Bayat ti panagpapatangda, inawis dagiti suspek ni Chan  a mangkuyog kadakuada a mapan gumatang iti lumber sadiay Bantay ket immannugot met ti lakay.

Segun ken ni Chan, idi addadan iti Bantay, pinorsar nga innala dagiti suspek ti kuartana a P10,000.00, relona nga agbalor iti P300,000.00, ken kuentasna nga aggatad iti P200,000.00 sada naglibas a nakalugan iti Mitsubishi Lancer.

Dagus a nangiwayat ti polis-Vigan iti manhunt operation ken nangipatulod iti flash alarm iti kaparangetda a police stations para iti pannakapasardeng ti lugan dagiti suspek.

Dagus met a nangipasdek dagiti polis-Candon City iti checkpoint iti sango ti Bagani Campo Cemetery apaman a naawatda ti flash alarm manipud iti kapolisan ti Vigan City ket pinarada ti Lancer idi mapasungadanda.

Ginandat ni Javines nga atalan ti dua a polis iti pananglibasda iti checkpoint ngem kinamat ida dagiti pannakabagi ti linteg agingga iti naipiskot dagiti suspek iti sanguanan ti North Peninsula Subdivision, Barangay San Agustin.

Malaksid ken ni Javines a nanggandat a mangatal kadagiti dua a polis, naipaima dagiti uppat pay a suspek iti polis-Vigan agraman dagiti kuarta ken gameng ni Chan.#

Comments are closed.