Footer

Kotse a nangsukon iti suspek ti pannakapapatay ti police officer, natuntonan

BANTAY, Ilocos Sur -Agparparang nga adda sabali a kotse a nagluganan ti suspek iti pannakapapatay ti maysa a police officer sadiay Manila kalpasan nga impaknina ti getaway car nga inaramatna iti panaglibasna kalpasan ti krimen.

Daytoy ti limtuad iti agtultuloy a panagimbestiga ti kapolisan mainaig iti Ford Ecosport a naabandonar iti maysa a sitio iti Vigan City  tallo nga aldaw kalpasan ti Paskua.

Nasarakan a naabandonar ti nasao a lugan iti talon a masakupan ti Sitio Nalasin, Barangay Camangaan ditoy siudad idi agsapa ti Disiembre 28 babaen iti maysa a mannalon nga agnagan iti Mario Quilana, taga-Barangay Camangaan.

Iti panagimbestiga dagiti polis, natuntonanda ti lugan a nairehistro iti maysa a Ma. Hilda Bote Herrera, residente iti No. 2015 S. Reyes Street, Sta. Cruz, Manila.

Segun iti polis, naaramat ti kotse a getaway vehicle ti maysa nga Allan Liwanag a mapapati a kangrunaan a suspek iti pannakapapatay ni retirado a Police Supt. Cipriano Herrera, residente iti Sta. Cruz, Manila.

Ngem iti follow-up investigation nga inwayat ti nagtitipon nga elemento ti kapolisan a pakaibilangan ti Homicide Division, Manila Police District nga indauluan ni PSI Rommel Anicete, HPG Ilocos Sur PPO ken ti Vigan City Police Station, ken koordinasion ti Bantay police station, natuntonan ti maysa a saksi a nangkumpirma a maysa a Kia Pregio nga addaan plate number WLA 168 ti mapapati a nagluganan ni Liwanag kalpasan nga inabandonarna ti Ford Ecosport iti Sitio Nalasin.

Maysa a William Arciento, 51, naasawaan ken residente iti Barangay Buquit, Bantay, Ilocos Sur ti mapapati nga akinkukua iti Kia Pregio.

Naawis ni Arciento iti Bantay Police Station tapno mapagsaludsodan.#                           

Comments are closed.