Footer

OPERATION PULOTAN

Sarita ni Jobert M. Pacnis

(Maikadua a paset)

No maminsan, duada laeng nga agsango nga agatanud no adda naidum-duma a pulotanda. Kas koma iti pinalatan ken siniwsiwan a pato. Ken kappukan. Wenno kilawen a tangige. Aglalo la ngaruden no namnamaenda nga awan ti mabitbit a pagpaanud dagiti kakla-eda.

Uray bassit ti kuarta ni Sabas no agpaili, kasta unay ti yawidna a taraon. Kasano, iti man kaikanan, kakarnean wenno iti kanatengan, adda pakpakayabkabanna a tindera. Balasang, naganak a balasang,  balo, saanna a pakawanen. Uray aglaklako iti tuyo. Isu pay a mainutna. Naamo kenkuana dagiti tindera ta nalaing a mangboladas ken inayon ditan ti kupikopna a kinataer.

ADUN ti tao a nadanonda iti kamposanto. Nakalawlawag ti aglawlaw. Nadalusanen dagiti cadena de amor kadagiti panteon. Kaaduan payen kadagitoy ti napabaro ti pintada.

“’Diayta, ‘tanud,” insungo ni atanudna ti amianan-a-laud a yan dagiti nabalayan a panteon. “Adu la ketdi ti grasia sadiay…”

Simmingitda kadagiti tao. Ngem pagnaenda lattan ti rabaw dagiti panteon no awan pay ti taona. Napaisem ni Sabas iti nakitana a nagadu a bitbit a plastik dagiti malabsanda. Ammona lattan a makan dagitoy. Naimbag ta saan a naiget ditoy ilida saan a kas idiay siudad a nagadu a maiparit nga iserrek iti kamposanto. Uray makan ken mainom!

Nalabsanda ti maysa a kabarbaro a panteon. Iti lapida, awan pay makabulanna a naitabon ti bangkay. Napamulagat pay ni Sabas idi mabasana ti nagan ti natay: Caljen Tapayan. Dina man a nadamdamag a pimmusayen daytoy a tagakabangibangda a barangay. Kimmapsut sa metten ti radarna? A, malagipnan! Awan idi iti ilida kadagita a panawen ta kinuyogna ti kasinsinna a taga-Apayao a napan nagipagna idiay Manila kadagiti papelesna nga agabrod.

Ta asino ngamin, aya, daytoy a Caljen?

Naikamkamang laeng ditoy ilida. Damagna, taga-Cebu. Ngem isu ti nganngani nakaisagmakan ni Maestro Rilo a dati a mistrona iti hayskul. Kasano, di man la nagamak daytoy a nangkabit iti asawa ti nakasingsingpet a mistro. Naimbag ta nakapaglemmeng idi nagpagunggan ti mistro.

“Ania ti impatay ti asawayo, misis?” dinamag lattan ni Sabas iti babai a mangip-ipan iti sabong ti rabaw ti panteon nga impatona nga asawa ni Caljen.

Kinita laeng ti babai. Nalabit, laslasinenna.

“Gayyemnak ni Caljen, misis,” inlibakna. “Kassangpetko manipud idiay Qatar a nagtrabahoak iti dua a tawen kas inhiniero. Diak nadamag ta nakapagpawitak koma met.”  Sinidolna ti atanudna ta tiptipden daytoy ti ayek-ekna.

“Nadisgrasia, adingko…” insaibbek ti babai. “Naidungpar iti poste ti CAGELCO.”

Kitaem laeng ti biag, nakuna ni Sabas iti panu-notna. “Makipagladingitak, misis,” pinalidayna kampay idi ti timekna. Ngem itay pay a sipsiputanna ti ir-iruar ti babai a naisupot. Amaya, letson a manok!

“Agyamanak…”

“Lando, misis…” inlibakna idinto nga inyawatna ti dakulapna. “Lando Pabilo…” Nataldiapanna ti idadateng ti lugan ni Fr. Omar Revalaz. Nagkakaribuso dagiti tao a nangsabet iti padi.

“Sige pay ngarud, misis,” imballaet ti atanudna, “ta inkami man met kitaen dagiti immunan nga ipatpategmi iti biag,” insungona ti amianan a paset ti kamposanto.

“Sige…” indisso ti asawa ni Caljen ti balonna a letson iti naiparabaw a bulong ti saba iti panteon.

“Addan ni paderrrr!!!” inriaw dagiti tao.

Nagdardaras ti babai a kimmita iti nagtaudan ti karibuso. Napan timmipon kadagitoy ta mapanna la ketdi ipalista ti nagan ti asawana tapno mairaman iti mawarisan madamdama.

Daytoyen ti inur-urayda. Kasla kimat a nagkuti ti atanudna. Presto, awanen ti letson iti nakaiparabawanna. Linaonen ti karatay daytoy a bag. Makais-isemda a nagturong iti namnamaenda a ‘yan pay dagiti agkakaimas a taraon kalpasanna.

Naglinongda iti sirok ti barakbak iti ampir ti alad. Ditoy nga agsiimda iti sumaruno a klienteda. Nagpakada ni Ferdie idi agangay.

“Maymaysa pay laeng, ‘tanud, mapankan?” sina-ludsod ni Sabas. Ammona lattan a mapan iplesing ni atanudna ti letson. Ta no bilang adda man mangpabasol kadakuada, awan ti ebidensiada ta awan met linaon dagiti bagda.  Idi pay la kalman a nakaaramidda iti “paksul” dagiti maoperasionda a makan. Adda daytoy iti rimmuok dagiti pandan iti pantok iti amianan nga ampir laeng ti alad ti kamposanto. Nasamek ditoy ken awan matatao.

“Inta ketdin a dua,” inyawis ti atanudna.

“Apay?”

“Agrebolusionen dagitoy tarakenko. Diak nammigat…”

Napangilangil. Ngem napakatay a nakalagip iti letson a manok. Narigat no soluen ni atanudna. Nagkuyogda a nagpapantok.

Agkakamakam dagiti tig-abda idi kasla nagdalanan ti bagyo ti sangabukel a letson. Saan a bale, kinunada, adu pay ti maoperasionda. Ta saanda met a kapuy!

(Adda tuloyna)

Comments are closed.