Footer

Pannakiabig, kinaliway ken pannakaabuso

Nadumaduma dagiti rason no apay a marakrak ti nasinged a langenlangen dagiti agassawa, segun iti maysa a panagadal.

Naduktalan iti panagadal dagiti autoridad iti kasar nga uppat a pulo a porsiento, wenno nangatngato pay, kadagiti lallaki nga addaanen iti asawa ti masulisog  iti extra marital affairs nangruna kadagiti dakkel ti sueldoda ta nabuslon ti makukuartada a gastuenda iti maiparparit nga ayat. Nasurok met a tallopulo a porsiento kadagiti babbai a naasawaan nga adda iti edad tallopulo agingga iti tallopulo ket lima ti maaddaan iti extra marital affair.

Adda tallo a rason no apay a makiabig ti maysa a lalaki wenno babai.

Umuna, agsipud ta nabayagen nga adda im-impenna a gura ken sakit ti nakemda iti asawana ngem saanna a maibuksilan wenno maiparikna gapu iti amak wenno butengna. Yan ti rigatna, no sumangbay ti sabali a lalaki iti biagna a makaawat iti sasaadenna, masarakanma laengen a matinnag ti riknana iti daytoy uray ibagbaga ti panunotna a saan a maikanatad ken maisalungasing iti nariinganna a moralidad.

Maikadua, gapu iti personal a pagkasapulan. Gapu ta nangato ti puesto ti lalaki wenno babai, maigubetda iti trabaho; nakurangen wenno awan payen ti panawen ti maysa para iti asawa ken ti anakna. Saanna payen a maited ti seksual a kasapulan ti asawana ta masansan a no naggawid iti balayda, nabannog unayen  ket turoganna ti asawana a nagdigos ken nagbangbanglo pay tapno makakayaw a danonenna.

Maur-urnong dagitoy a pannakaupay agingga iti “mapunno diay salup” ket iti panaglipias ti busor ken im-impen ti maysa, agbirok iti mangsullat iti nagkurangan ti sabali.

Ti rigatna no adda umar-arubayan a kulibangbang, di mapupuotan ti sabong a sisisipen gayamen daytoy ti sam-it ti dirona. Wenno saan, agadiwara ti kinabanglo ti sabong ket agpasag ti pul-oy iti saklot ti kinalasbang daytoy.

Maikatlo, kayat met ti babai nga uray kasano ti kaadu ti trabahona iti balay, maaddaan met ti wayawaya nga umaliwaksay no maminsan. Ngem no awan panawen ni lakayna, dakkel ti posibilidad nga iti panagwaywayas ni babai iti panagpasiarna iti ruar, makasarak iti lalaki a makaawat iti sasaadenna, ken mangited iti birbirokenna a kurang iti biagna. Kasta met laeng iti lalaki. Masansan a maibarkada daytoy gapu ta kayatna met ti umaliwaksay. Ti makadakes no adda mangparimrim kenkuana ket saannan a malagip pay ti agur-uray iti pagtaenganda.

Adda sumagmamano a wagas tapno maliklikan ti extra-marital affair: daytoy ket babaen ti pannakaammo kadagiti pagilasinan ti problema iti nagbaetan ti agassawa. Adda dagiti aw-awaganda a danger signals. Kas koma no kaykayatmo a kadua dagiti katrabahuam ngem ti asawam, dakes daytan, pagilasinan nga agmawmawen ti panagayatmo iti asawam. Dagiti dadduma pay a pagilasinan: no ibagbagam ti sikretom kadagiti gagayyem ken katrabahuam; no naragragsakka a kaduam iti lakaran ti sabali a lalaki wenno gagayyemmo a babai ngem ti agpakuyogka iti asawam; ken no agsarsarapaka no masaludsod kenka no apay a nakaas-asidegka iti sabali a tao.

No addan dagitoy a pagilasinan, panawenen nga utobem iti bagim no ania ti pagikayam iti asawam, wenno ania dagiti nagkurangam wenno nagkamtudanna a makagapu a dumakdakkel ti giwang ti relasionyo nga agassawa.

Maysa pay a gapu ti pannakarakrak ti pagtaengan ti kaawan ti panawen ti agassawa a mangpalagda iti umok ti pagtaenganda.

Kas koma daytoy: ni mister ket makumikom iti trabaho ken manmano a makita ti pamiliana. Ni met misis, adda nangato nga ambisionna para iti bagina ket paggiddanenna ti karerana ken panangay-aywanna iti pamiliana. Iti panaglabas dagiti aldaw, awanen panawenda nga agkita ken agkadua! Awanen ti panawenda para iti tunggal maysa. Pagtungpalanna, agbalinda a ganggannaet iti bukodda a pagtaengan. Saandan nga agsarsarita iti maysa ken maysa ket mabalin a kunadan: “Ania koma pay la ti rason nga agtiponta? Isu nga agsinada metten.

Sabali pay a makagapu iti itatayab ti singensinged iti uneg ti pagtaengan ti panagabuso ti maysa iti kabinnuligna iti biag wenno iti pamiliana.

Maibasar iti estatistiko, tallo agingga iti uppat a milion a babbai iti makabkabil iti tinawen iti pagtaenganda babaen iti asawa, sigud nga asawa, kamalala wenno nobioda.

Segun met iti maysa a panagadal, innem a pulo a porsiento kadagiti dimmakkel nga annak ti nakitkitada ti amada a mangkabkabil iti inada.

Ti pannakaabuso ti kagrabean a rason ti panagsina dagiti agassawa , ngem isu met ti kalakaan a maire-medio. Kasano? Ti kan lalaki a mangbugbog iti asawana ket saan a “monster”, ketdi, naadalna ti kasta a galad. Mabalin a binugbog ti nagannakna idi ubing pay wenno adda naimatanganna a kasta a tinawidna metten agingga a dimmakkel.

Mabalin a malapsut kadakuada ti kasta a galad babaen ti psychological counseling. Isu a no ay-ayatem ti asawam, (nangruna dagiti babai), ti bagim ken dagiti annakmo, nasken a mangiwayatkan iti addang tapno agturposen ti kasta a dakes a galadmo  a nalaing a mangbugbog iti asawana.#