Footer

Sabali manen a dormitorio iti Vigan City, natakawan

VIGAN CITY – Sabali pay a dormitorio iti Barangay Tamag ditoy siudad ti  natakawan idi Enero 4.

Inreport ni Cristina Fernando y Carubeo, 47, awanan asawa, caretaker,  a natakawan ti Betty’s 6 Angels Dormitory a masarakan iti Quirino Boulevard, Brgy. Tamag ditoy siudad no sadino nga uppat nga estudiante nga agbasbasa iti University of Northern Philippines ti napukawan iti selpon ken kuarta.

Nainaganan dagiti biktima a da Joanna Doza Battog, 18, balasang ken residente iti Brgy. Panay Sur, Magsingal, Ilocos Sur; Malourian Quiñola Ordoñez, 17, balasang; Jasmine  Quiñola Ordoñez, 18, balasang, ken Anglica Zoliona Bilog, 19, balasang, agpapada a residente iti Brgy. Apatot, San Esteban, Ilocos Sur ken agbasbasada amin iti University of Northern Philippines, ditoy siudad.

Iti inisial a panagimbestiga ti polis, agarup 4:00 ti parbangon  iti nadakamat a petsa idi sinerrek ti dua a di nabigbig a lalaki ti up-upaan a kuarto dagiti biktima ket kinurimesda ti kuarta, selpon, ken dadduma pay a gamit dagiti biktima.

Saan a napuotan dagiti biktima ti iseserrek dagiti mannanakaw ta narnekan ti turogda.

Natakaw ti back pack ni Doza a naglaon iti pink pouch a nakaikabilan ti P2,600.00, library card, 2 a libro ken 3 a handouts; Samsung Galaxy cellular phone nga agbalor iti P6,000.00 ken ni Malourian Quiñola; ken brown wallet a naglaon iti P3,000.00 ken ni Jasmine Quiñola.

Awan ti nailanad iti blotter a natakaw manipud ken ni Zoliona.

Tapno adda pagsarudengan dagiti agpanggep n ga agtakaw, idagdagadag ti kapolisan kadagiti agtagikua iti dormitorio ti pannakaikabit ti CCTV ken panangala dagiti agtagikua iti dormitorio iti guardia ngem agparparang a saan a maitaltalek daytoy.#

Comments are closed.