Footer

19 nagpaso ti lisensiada a paltog, naideposito iti police station

SALCEDO, Ilocos Sur – Agbungan ti nainget a kampania ti kapolisan maikontra iti loose firearms ta umad-adun ti bilang dagiti gun owners nga agideposito iti nagpason ti lisensiada a paltogda.

Manipud Enero 10 agingga iti Enero 13, sangapulo ket siam nga agtagikua iti paltog a nagpason ti lisensiada ti boluntario a napan iti police stations tapno idepositoda para iti pannakaaywanda dagiti paltogda.

Iti kaudian a report, innem a gun owners nga agnaed iti Banayoyo ti boluntario a nagdeposito ti paltogda iti police stations para iti pannakaaywanda; 6 iti Salcedo; 4 iti Sta. Catalina; 2 iti Cervantes; ken maysa iti Nagbukel.

Karaman kadagiti gun owner a nagpason ti lisensiada ti maysa a dati a mayor, maysa a barangay captain, anak ti retirado a police officer, ken maysa nga agtrabtrabaho iti ganggannaet a pagilian.

Kaadduanna kadagiti naideposito a paltog ti cal. 45 nga agdagup iti 10; tallo ti shotgun; 2 ti .9mm pistol; 2 ti cal. 22; ken maysa a baby armalite a kukua ti dati a mayor.

Kaadduanna kadagitoy nga armas ti nagpaso ti lisensiada idi napan a tawen. Maysa ti saan a napabaro ti lisensiana idi nagpaso idi Enero 2014.

Segun iti maysa a hepe ti polis, naideposito dagiti paltog iti police stations tapno aywananda ket santo laeng maisubli dagitoy no nakaalan ti akinkukua iti permitna.

Ipakpakat ti kapolisan iti probinsia ti Oplan Katok ken agresibo nga information dissemination kas paset ti kampaniana kontra loose firearms ken paltog a nagpason ti lisensiada kas panagtungpal iti Comelec gun ban a nangrugi nga inyimplementarda idi Enero 10, panangrugi ti election period para iti May 2016 national and local elections.

Mapattapatta nga adu pay dagiti kolorum  nga adda iti ikut dagiti irresponsible a tattao ket daytoy itudtudo ti Comelec a makagapu iti nadamsak nga eleksion.#