Footer

4 tattao, naaresto iti imminget kampania ti kapolisan kontra loose firearms

BANTAY, Ilocos Sur – Uppat a tattao a pakairamanan ti maysa a retirado nga empleado ti naaresto iti nagsisina nga operasion ti kapolisan kas paset ti panangipakatda iti Comelec gun ban ken kampaniada maikontra iti loose firearms.

Idi agarup 5:30 ti Enero 12, immuna a sinukisok dagiti nagtitipon nga elemento ti Sto. Domingo Municipal Police Station, PIB, CIDG Ilocos Sur PPO ken ISPPSC, nga indauluann ni COP Police Inspector Edgardo Tabin ti balay ni Ernesto Villegas, Jr. y Tugare sadiay Sitio Ubbog, Barangay Naglaoa-an, Sto. Domingo ngem negatibo ti resultana.

Nupay kasta, iti dayta met la nga agsapa, positibo ti panagsukisokda iti balay ni Dante Sonido y Siruno sadiay Barangay Flora iti met laeng Sto. Domingo a nagresulta iti pannakakumpiskada iti  maysa a cal. 45 pistol (Armscor) nga addaan SN: 804221; 5 a magazine assemblies para cal. 45 pistol; 2 gun holster; ammunition/bullet case; 4 bala para cal. 22; 52 bala para cal. 45; maysa a bala cal. 9mm; ken 36 kapsula ti cal. 45.

Imet dagiti polis ti search warrant nga inyisio ni Judge Kurt Elijay Q. Tremor ti MTC Sto. Domingo idi sinukisokda ti balay ni Sonido a sinaksian dagiti opisial ti barangay.

Kabigatanna, Enero 12, babaen ti bileg ti search warrant nga inyisio ni Judge Francisco A. Ante Jr. ti MTCC, Vigan City, sinukisok dagiti elemento a pakaibilangan ti CIDT Ilocos Sur, HPG Ilocos Sur, PIB, ISPPSC, Maritime Ilocos Sur ken Vigan City Police Station babaen ti direkta a  superbision ni COP Police Supt. Jugith Del Prado, ti balay ni Zacarias Piano de Peralta, 68, ken residente iti Barangay Capangpangan, Vigan City a nagtungpal iti pannakakumpiskada iti innem a  bala ti Caliber 7.62 ; 4 balbala ti Caliber .45; maysa a bala ti Caliber 5.56; 32 pieces live ammunitions of caliber 7.62; saggaysa a  bala ti Caliber 30, Caliber 5.56, Caliber 38, ken homemade buckshot; 4 bala ti gauge 12; ken 7 a bala ti Cal. 7.62.

Kabayatanna,  nasamsam dagiti polis-Bantay iti ikut ni Loy Parel y Paz, 72, retirado nga empleado iti gobierno, ken residente iti Zone 2, Bantay, Ilocos Sur, ti maysa a caliber 45 a nagmarka iti Remington nga addaan serial number 701423 ken magasin a nagkarga iti pito a bala.

Kas maibatay iti report, agiwaywayat iti clearing operation dagiti tanod manipud Barangay Capangdanan, Bantay, iti rota ti prosision ni Nuestra Señora De La Caridad idi malem ti Enero 12 idi nakitada ni Parel a nakasabbikel iti paltog ket impakaammoda iti police station.

Imbaon ti OIC ti Bantay police station ni SPO1 Joel Saniatan Javier, Intel operative, a mangberipikar iti imporasion.

Nasalamaan ni Javier ti suspek a nakasabbikel iti paltog ket pinadasna a gammatan ngem timmaray ti suspek a nagturong iti balayna.

Timmulong dagiti kameng ti SWAT ti ISPPSC  a nangkamat  iti suspek agingga iti natiliwda daytoy.

Naipan ti suspek agraman dagiti nakumpiska kenkuana iti police station para iti dokumentasion.

Iti pannakaisurat daytoy, maisagsagana metten ti kaso a panaglabsing iti Comelec gun ban ken RA 10591maikontra ken ni Parel.#