Footer

Maibiahe a marihuana, nakumpiska iti police checkpoint sadiay Alilem

CAMP ELPIDIO QUIRINO, Bantay, Ilocos Sur –Lima a bricks ken 15 rolio ti marihuana  nga ipuslit nga ibiahe ti maysa a courier ti kinumpiska dagiti polis-Alilem iti impasdekda a checkpoint sadiay Brown Street, Alilem idi agsapa ti Enero 14.

Inaresto dagiti polis ti drug courier a nabigbig idi agangay a maysa a Rolando Kios y Das-ilen, aka Lando, 23, baro, ken residente iti Sitio Indadangan, Barangay Kayapa, Bakun, Benguet nga akinbagahe iti sako ken bag a nakaikargaan dagiti bricks ken rolio ti marihuana.

Nangipasdek dagiti polis iti checkpoint iti nadakamat a lugar kalpasan a nakaawatda iti mensahe manipud iti maysa nga umili a maysa a passenger jeepney a nagkarga iti maiparparit a droga a kuyogen ti maysa a lalaki a courier ti agbiahe manipud iti Kayapa, Bakun, Benguet ket lumabas iti Alilem, Ilocos Sur.

Idi agarup 8:15 iti agsapa ti nadakamat a petsa, nasaripatpatan dagiti polis a sumungad ti passenger jeepney nga addaan plate number 012606 ket pinasardengda sada sinukimat dagiti karga ti lugan. Ditoy a nasukalanda ti maysa a sako nga addaan name tag a “Lando”.

Pinaluktan dagiti polis iti drayber ti sako ket naduktalanda a naglaon daytoy iti lima a bricks ken 12 nga immatiddog a rolio ti marijuana fruiting tops a nabungon iti brown packing tapes.

Nakaduktal pay dagiti polis iti sabali pay a bag a nagmarka iti Columbia Titanium a nagkarga iti tallo a rolio ti marijuana fruiting tops a nabungon met la iti brown masking tape.

Kinumpirma ti drayber  a nabigbig idi agangay a maysa a Juan Labungan Talabing a kukua ni Kios ti sako ken ti bag.

Sinaksian da Barangay Captain Robert Lorenzana ken pannakabagi ti Department of Justice a ni Gelaiza Lem. Tique ti pannakainbentario dagiti nakumpiska a droga.

Naikustodia ti suspek iti Alilem police station idinto a naipaima dagiti nakumpiska a marihuana bricks ken rolls nga agdagsen iti 17.8 kilos nga agbalor iti P445,000.00 iti crime laboratory ti Ilocos Sur Police Provincial Office para iti pannakaamirisda.

Maisagsagana metten ti kaso a panaglabsing iti RA 9015 maikontra ken ni Kios.#

Comments are closed.