Footer

Balay ti barangay captain, sinerrek ti mannanakaw

VIGAN CITY – Uray balay ti barangay captain, saanen a kabuteng ti mannanakaw a serken.

Iti kaudian a report iti panagtakaw a naisayangkat ditoy a siudad, mismo a ti balay ni Barangay Captain Jay Formoso Andia, 35, naasawaan, residente iti Barangay II ditoy siudad, ti sinerrek ti mannanakaw ket kinurimesna dagiti alahas ken selpon ni Jennifer Formoso Pabo, kabagian ni Kapitan Formoso a maestra nga agnaed iti balayna.

Napasamak ti panagtakaw iti nagbaetan ti 1:00 agingga iti sakbay ti 6:00 ti bigat ti Enero 20.

Segun iti panagimbestiga dagiti polis, natakaw ti bracelet ti maestra nga agbalor iti P3,000.00, ti kuentasna nga agbalor iti P3,000.00, aritos nga aggatad iti P700.00 ken selponna a di nailanad iti report no mano ti balorna.

Iti dayta a rabii, nagatendar ni Formoso iti Education Night a naangay iti Plaza Burgos, Barangay I ket ala unan ti parbangon idi naggawid.

Mapapati nga indisso ni Formoso dagiti alahas ken selponna iti lamisaan nga asideg iti tawa sakbay a naturog.

Kabigatanna, idi bimmangon iti agarup 6:00 am iti bigat, naduktalanna nga awanen dagiti alahas ken selponna iti nakaidissuanda.

Immun-una ngem daytoy, idi aldaw ti Enero 16, naduktalan a sinerrek ti/dagiti mannanakaw ti rest house ni Mario Rabit Relon, 31, naasawaan, a masarakan iti Barangay Tamag ditoy met laeng a siudad.

Natakaw iti balay ni Rabit ti maysa a laptop nga agbalor iti P16,000.00, tablet nga agbalor iti P9,000.00, sensilio nga agdagup iti P700.00, ken US$15.00.

Mapapati a napasamak ti panagtakaw bayat ti kaawan dagiti bumalay idi Enero 15. Sa laeng naduktalan ti panagtakaw idi naggawid ti biktima iti balayna idi agarup 9:30 ti bigat ti Enero 16.

Rimmuar iti inbestigasion a simrek ti/dagiti mannanakaw iti balay babaen ti galbanisado a tawa iti amianan a paset ti balay ket ditoy met laeng ti rimmuaranda.

Segun iti report, nakaala ti kapolisan ti Vigan City iti sumagmamano a lemma ti ramay idi nagprosesoda iti crime scene.#

Comments are closed.