Footer

Dati a kameng ti NPA, simmuko kalpasan ti serye a negosasion

VIGAN CITY – Boluntario a simmuko iti otoridad itay nabiit ti maysa a dati a kameng ti New People’s Army nga agsusukot ti kasona iti korte ditoy probinsia kalpasan ti serye a negosasion dagiti kabagian ken gagayyemna ken iti initiatibo ti hepe ti Provincial Intelligence Branch ti Ilocos Sur.

Boluntario a simmuko ni Joel Ujano y Almazan, 38, natibo ti Barangay Maratudo, Magsingal, Ilocos Sur, dati a miembro ti Execom KLG Villar ken adda iti babaen ti watchlist ti SYP Austin, KLG North East, agpada a grupo dagiti lokal a terorista nga agdakdakiwas iti Ilocos Cordillera Regional Committee (ICRC), kadagiti elemento ti PIB-Ilocos Sur PPO, RID PRO1, RPSB1, RIU1, CIDT-Ilocos Sur, ISPPSC, 73rd MICO, 702nd Brigade-Phil Army, PCR-Ilocos Sur, ken police stations ti Candon City, Sta. Cruz, Sta. Lucia, Cabugao ken Magsingal iti babaen iti overall supervision ni   Senior Supt. Reynaldo M. Tamondong, OIC, iti simple a seremonia a naangay iti provincial capitol idi malem ti Enero 20.

Mismo nga inimatangan ni Governor Ryan Luis Singson, Department of Interior and Local Government Provincial Director Agnes De Leon, Provincial Social Welfare and Development Officer Ferdinand Concepcion, Provincial Legal Officer Atty. Gigi Tesoro ken CO of 73rd MICO Captain Ian Galera ti isusuko ni Ujano iti otoridad.

Babaen iti initiatibo ni Police Chief Inspector Honesto T. Lazo, Jr., acting chief ti PIB Ilocos Sur, nairusat ti serye a negosasion dagiti kabagian ken gagayyem para iti naannayas nga isusuko ni Ujano.

Adda nakapatong a P500,000.00 a gunggona manipud iti DND-DILG para iti pannakatiliw ni Ujano.

Dati a kameng ti NPA, sumangsango ni Ujano iti agsusukot a kaso iti RTC Candon City ken Cabugao, Ilocos Sur a pakaibilangan ti arson a nai-docketed iti CC No. 2406-C; murder a nai-docket iti babaen ti CC No. 2407-C ken CC No. 2408-C; robbery, nai-docket babaen ti CC No. 2405-C, panaglabsing iti PD 1613 a nai-docket iti CC No. 3020-C; frustrated murder a nai-docket iti babaen ti CC No. 2223-KS.

Nakalista pay ti akusado a dati a kameng ti NPA ken No. 1 iti Sibat Priority Target, Provincial Level.

Naipaiman ni Ujano iti Ilocos Sur provincial jail, Bantay, Ilocos Sur.#

 

Comments are closed.