Footer

Kaso ti anak a tinagbat ti amana, nagtungpal iti areglo

ALILEM, Ilocos Sur – Awanen ti sabali nga opsion ti kapolisan ditoy nga ili no di ibilang a naserraanen ti maikontra iti ama a nangtagbat iti anakna idi rabii Enero 19 gapu ta nagareglon dagiti dua.

Immun-una ngem daytoy, naipaima iti opisina ni Associate Provincial Prosecutor Arceli Perla Y. Rebollido-Refuerzo ti kaso a frustrated parricide maikontra ken ni Rolando Lausan y Cubalit, 46, naasawaan, mannalon, gapu iti panangtagbatna iti anakna a ni Roldan Lausan y Suoc, 21, awanan asawa, trabahador, bayat ti panagsubangda nga agama idi rabii ti Enero 19.

Ngem imbasura ni Rebollido-Refuerzo ti kaso maikontra ken ni Lausan agsipud iti mapapati a teknikalidad, gapu ta saan a naaresto ti suspek no di ket simmuko, saan a presente dagiti kasapulan iti warrantless arrest, ken saan a presente ti biktima kabayatan ti inquest agsipud ta adda pay la iti ospital.

Naruk-atan ni Lausan ket naikustodia ken ni Barangay Captain Basanio P. Licuasen para iti posible a panagaregloda nga agama.

Maipalagip nga mmuna a naitaray iti rural health unit ditoy nga ili ni Roldan Lausan y Suoc, 21, awanan asawa, trabahador, residente iti Barangay Apang sa naiyalis iti iti Ilocos Training Regional Medical Center, San Fernando City gapu kadagiti sinagrapna a sugat iti nadumaduma a paset ti bagina gapu iti panangtagbat kenkuana ti amana a ni Rolando.

Iti panagimbestiga dagiti polis, idi agarup 9:00 ti rabii ti Enero 18, naggawid ni Roldan nga adda iti inpluensia iti arak ket nagsubangda nga agama.

Mapapati a nangala ni Rolando iti bolo sana inwasawas iti sanguanan ti biktima ngem dimmarup latta daytoy a nagtungpal iti pannakatagtagbatna iti ngato ti makannigid a matana, tengnged, ken iti makannigid ken makannawan a ramramayna.

Mapapati nga adda dati a susik dagiti agama ket narubroban iti dayta a rabii a nakainom ti anak.#