Footer

Operation Pulotan

Sarita ni Jobert M. Pacnis

(Maudi a paset)

 

“Gayyemnak ni Carding, lola,” kinuna ni atanudna. “Kinapudnona, nagkaadalankami dita BNHS.” Ballesteros National High School ti kayatna a sawen.

“Kasta kadi, barok?”

“Wen, lola.”

“Menoposal beybik ni Carding. Dinungdungngok unay. Ngem anian ta nagulpit ti gasat kenkuana. Nasapa nga innala ni Patay…” insaibbek ti baket.

“Impatayna, lola?”

“Kinursonada dagiti naapiang iti maiparit nga agas.” Nagarubos ti lua ti baket. “Kagapgapuna idi idiay Tuguegarao a pagtrabahoanna. Naamitan iti dalan isu nga awanen ti nalugananna a nagpa-Sta.Cruz. Nagnagna. Ngem isu metten ti…” ket inyanug-ogen ti baket.

“Makipagladingitak, lola,” kinuna ni atanudna. “Saanko man la a nadamdamag ti napasamak ni klasmeyt. Kassangpetko ngamin a naggapu idiay Saudi Arabia.”

Napaellek iti kinuna ni atanudna. Lokdit, no addaka laeng a warawara nga asseng iti Brgy. Ammupay, kinunana iti unegna.

“Agyamanak, barok,” pinunas ti baket dagiti luana. Nangitugkel iti kandila. “Isu a daytoy, insagutak iti paggugustona.”

“Blak leybel, lola?”

“Wen. Ngem saan a mangnginom ni Carding. Kayatanna laeng ti agkolekta kadagiti agkakangina nga arak. Tunggal agsueldo, adda la nga adda gatangenna a nayon dagiti koleksionna.”

Napatung-ed ni atanudna.

Nagulimek ti baket. Nagdumog ket ammona lattan nga agkararag daytoy.

“Pinawarisanyon ni klasmeyt, lola?” dinamag ti atanudna kalpasanna.

“Hampay ngarud, barok,” insungbat ti baket. “Diak met makasallin iti kaadu ti mangsursurot ken ni Apo Padi.”

“Kuyogenkayo, lola, ta inta agpalista. Am-ammok ‘diay intsarge.”

“Ala man ngarud, barok…” inyanamong ti baket. “Ngem awan metten ti mangbantay kadagitoy inyatangko. Baka asuen.”

“Awan met pay ti nakitak nga aso, lola,” impasingked ni atanudna. “Sa maysa, nagadu a tao. Awan met ngata ti mangloko a mangala, a. Dida la agbutengen?”

Nagkuyog da atanudna ken ti baket a nagturong iti yan ti grupo ni Apo Padi nga addan iti abagatan-a-daya a paset ti kamposanto. Agarup 60 metro ti kaadayona iti yanda. Sakbay a tinallikudan ni atanudna, kinidmatan daytoy.

Dinakon isuro, atanud, kinunana iti isipna. Pietsdiak ditan!

Kinitana ti aglawlaw. Agpayso, adu ti tao. Ngem makumikomda kadagiti minatayda. Idi masigurado ni Sabas a libren iti aramidenna, kasla kimat manen nga imbagna dagiti nayatang.

Sumipngeten idi inkeddengda nga agatanud ti agawid. Ngem kasla saan pay laeng a naksayan ti tao iti kamposanto. Kasla pay ketdi immadu. Sabagay, tinawenen a kasta. Arig agpatpatnag dagitoy a mangbantay kadagiti immunan nga ipatpategda. Ken agpatnag metten a ragragsak. Reunion, mabalin payen a kunaen.

Nagdiretsoda iti inaramidda a paksul tapno yawiddan dagiti bunga ti operasionda. Agpispissuol la ketdi dagiti bagda.

“Agur-uray itan dagiti klasmeytta, atanud,” kinuna ni Sabas.

“La ketdi, a,” insungbat ni atanudna. “Baka rinugianda payen ti klase uray boy bawang laeng ti an-anusanda a karkaremkemen? Piman met!”

Napapaggaakda.

Darasda nga inwalin dagiti sangsanga nga inyabbongda kadagiti naoperasionda. Ngem anian a pannakakellaatda ta iti lawag ti selponda, awan a pulos dagiti inlemmengda. Sinawarda ti aglawlaw. Ngem talaga nga awan!

“Naal-aliatan, ‘tanud,” kinuna ni atanudna.

“Saan, atanud,” kinunana met. “Kasano koma a mabagkat dagita nga al-alia dagiti taraon no agpayso man nga adda al-alia? Adda nakasiim kadata, dayta ti ammok…”

“Diallo, awanen ti nagrigrigatanta!” napangayemngem ni atanudna.

“Ania pay ngarud ita? Senalbag ketdi! Mabisinak payen.”

“Agsublita dita kamposanto bareng adda pay mabalin nga operasionenta, ‘tanud.”

Nagsublida iti kamposanto a manguddakudday. Ngem awanen ti napateg a gameng a nakaparabaw kadagiti panteon. Dagiti adda, adda met nakabantay ket pagsasanguanda dagitoy. Napakatayda laengen iti apalda!

Inkeddengda nga agawiddan. Nataldiapanda ti tallo a nabungon a baduya a nakaparabaw iti maysa a panteon iti wangawangan ti kamposanto. Nagpapausanda a pinidut daytoy naimbag laeng a pamedpedda iti bisinda.

“’Sino ngata ti diablo a nangala iti nagrigrigatanta, ‘tanud?” dinamag ni Ferdie kenkuana.

“Dayta ti saanta nga ammo, ‘tanud,” inkudkodna. Un-unorendan ti lipit a sumalpot iti barangayda. Napayamanda ta sellag. Saanen a masapul a luktanda pay ti lente a balonda.

“Ammok la koma ta kitaenna!”

Intuloyda ti nagna a sumanamtek. Mabatogandan ti bittaog a nangpayong iti lipit.

“Apay nga innalayo ti kanek?” pagammuan ta adda nagtimek a kagiddan ti immatibuor nga agatkandela.

“Sika ti nagsao, ‘tanud?” inamadna.

“Ney, saan, ‘tanud…”

“Isubliyo ti kankanek a baduya…” ti manen timek.

Simgar dagiti dutdotda. Idi taliawenda ti puon ti bittaog, anian a butengda. Adda nakabado iti puraw nga awan ti ulona dita. Kas iti mabuybuyada kadagiti pelikula!

Kunam pay, atiwda payen dagiti mannakilumba iti lubong. Saanen a makamatan ti kimat ti panagbuatitda.

Kabigatanna, nakamulengleng lattan dagiti agatanud.

Nabatida ti karkarmada iti kamposanto, kinunkunada kadakuada.#

 

Comments are closed.