Footer

Top most wanted drug personality iti Banayoyo, naaresto

BANTAY, Ilocos Sur – Ad-adda a dimmagsen ti kaso daytoy drug personality ta nakakumpiska dagiti elemento ti kapolisan iti ikutna saan laeng a droga no di pay paltog ken balbala idi iyimplimentarda ti warrant of arrest maikontra kenkuana iti maysa a pagdagusan sadiay Barangay Sabuanan ditoy nga ili idi malem ti Enero 19.

Segun iti report a dimmanon iti provincial police office ditoy, naaresto ni Noli Galangco y Gamata, 30, naasawaan, residente iti Sitio Apdo, Barangay Lintic, Banayoyo, Ilocos Sur iti uneg ti kuarto ti Mercar Traveller’s Inn a masarakan iti Barangay Sabuanan ditoy nga ili idi agarup 5:45 ti malem ti nadakamat a petsa.

Iggem dagiti operatiba manipud iti Banayoyo ken Sta. Lucia police stations ti warrant of arrest nga inyisio ni Judge Gina Juan-Chan ti Regional Trial Court, Branch 22, Narvacan, Ilocos Sur, idi arestuenda ni Galangco gapu iti panaglabsingna iti Section 5 ti RA 9165 a nai-docket iti babaen ti CC No. 4017-N.

Awan ti nairekomenda a piansa ni Galangco, Manhunt Charlie Top Most Wanted Person iti Banayoyo, gapu iti daytoy a kasona.

Kas maibatay iti report, bayat ti panangiwayat dagiti operatiba ti warrant of arrest ken ni Galangco, nakakumpiskada pay iti ikut ti suspek ti maysa a cal .38 revolver, addaan marka manipud USA ken serial number 284944, a nagkarga iti 6 bala; nangisit a holster; 18 a bala ti cal .38; bala ti cal .45; dakkel a heat sealed transparent plastic sachet a nagkarga iti 5 a bassit a heat sealed transparent plastic sachets a nagkarga iti mapapati a shabu; maysa a plastic sachet nagkarga iti masuspetsa a shabu residue; Swiss knife; 3 lighters, 3 pieces bamboo sticks a mapapati a maus-usar a rolling foil; 4 babassit a narolio nga aluminum foil; 2 narolio nga aluminum foil; maysa a pakete ti plastic sachet; glass totter; plastic straw; sling bag; cellular phone, P5,457.00, sumagmamano nga ID, ATM ken retrato.

Iti baba ti inn, nasiputan dagiti polis ti maysa a lalaki a nabigbig idi agangay a ni Ramon Dela Rosa y Puzon, 38, naasawaan, drayber, ken residente iti Barangay Pila West, Sta. Lucia, Ilocos Sur, a nangasut iti paltogna ket dagus nga inaresto ken kinumpiskada ti armas daytoy a maysa a cal .9mm pistol nga addaan iti magasin a nagkarga iti 15 a bala, Swiss knife ken dua a selpon.

Awan ti serial number ti paltog nupay addaan marka a Fabrigue Nationale D’ Armes De Guerre Herstal Belgique.

Naipan dagiti naaresto agraman dagiti nakumpiska kadakuada iti Sta. Lucia police station para iti dokumentasion ken umisu a disposision.#