Footer

Van, natnag iti waig, 2 nalmes

CERVANTES, Ilocos Sur – Nalmes ti drayber ti van agraman ti kaduana idi natnag ti luganda iti waig sadiay Sitio Bao-angan, Barangay Comillas ditoy nga ili idi malem ti Enero 17.

Nabigbig dagiti biktima a da Jun Alicio y Leo, 42, baro, minero ken residente iti Sitio Teteg, Barangay Cabitin, Mankayan, Benguet ken ni Gerald Bago y Peloca, 21, baro ken residente iti Sitio Batbato, Brgy. Cabitin, Mankayan, Benguet.

Iti report manipud iti police station ti Cervantes, idi agarup 11:50 ti bigat ti nadakamat a petsa, pampanurnoren ti Delica Mitsubishi van a minaneho ni Alicio ti barangay road ti Sitio Bao-angan, Barangay Comillas South idi napukaw ti kontrol ti drayber iti manibela ket natnag ti lugan iti waig.

Segun iti polis, nakubong dagiti biktima iti uneg ti lugan ket saanda a nakaruar a nagtungpal iti pannakalmesda.

Naitaray dagiti biktima iti Bessang Pass Memorial Hospital, Cervantes, Ilocos Sur ngem naideklarada a dead on arrival.

Mapapati nga adda dagiti biktima iti babaen ti inpluensia ti arak idi napasamak ti aksidente,#

Comments are closed.