Footer

2 menor de edad, masuspetsa a nagtakaw iti balay ti negosiante

SAN VICENTE, Ilocos Sur – Tallo ti naireport a panagtakaw idi rabii ti Enero 26 a pakairamanan ti balay ti maysa a konsehal ken maysa a negosiante.

Natakawan iti daytoy nga aldaw ti balay ti maysa a negosiante a residente iti Barangay Bayubay ditoy nga ili ket dua a menor de edad ti masuspetsa a nagtakaw.

Nainaganan ti akimbalay a ni Rosendo Vilog y Viernes, 50, naasawaan, negosiante, ken residente iti nadakamat a barangay idinto a nabigbig dagiti nagtakaw a da RJ Igot ken Reynaldo Igot, agpada a 13 ti tawenda ken residenteda met laeng iti nadakamat a barangay.

Segun ken ni Catherine Manzano y Rabara, nakitana dagiti suspek a simrek iti nakalukat a ruangan ti balay ni Vilog ket impulongna iti akimbalay.

Nagtelepono ni Vilog iti polis ket nagresponde met a dagus dagitoy ngem nakapanawen dagiti suspek sakbay ti isasangpet dagiti pannakabagi ti linteg.

Mapapati a kinurimes dagiti suspek ti P80,000.00 a naikabil iti Eura box.

Nangiwayat dagiti polis iti hot pursuit operation ngem saanda a nasapulan dagiti suspek.

Kabayatanna, nalibtawan ti maysa a konsehal a kinandaduan ti ridaw ti balayna idi napan nagpadanum ket ginundawayan dagiti mannanakaw ti kaawanna a nangkurimes ti laptop ken kuartada.

Kas maibatay iti report manipud iti police station ti Magsingal, idi agarup 11:30 ti rabii ti Enero 26, napan nagpasayak ni Sangguniang Bayan Member Emmanuel Tomaneng y Oandasan, 59, ken residente iti San Ramon, Magsingal, Ilocos Sur, ngem nalipatanna nga inkandado ti ridaw ti kusina iti likud ti balayda.

Idi agarup 5:00 ti bigat ti Enero 27, nakita laengen ni Marcela Tomaneng y Madriaga, asawa ti konsehal, a naiwarawara dagiti aruatenda ken nakalukaten ti ridaw ti kuartoda.

Idi nagsukimat ni Tomaneng, natakuatanna a natakaw ti Dell laptop nga agbalor iti P19,000.00 ken awanen ti brown bag a nakaikabilan ti P16,000.00.

Iti pannakaisurat daytoy, di pay ammo no asino dagiti nagtakaw iti balay ti konsehal.

Iti sabali a news, kitkitaen ti polis ti anggulo nga adda napasamak a panagtakaw iti maysa a burger stand wenno partuat laeng ti imahinasion ti sales lady.

Limtuad ti panagduadua dagiti inbestigador kalpasan a limtuad iti inbestigasionda nga awan ti nagparang a lemma ti ramay iti Frank Burger stand a nakapasamakan ti mapapati a panagtakaw.

Awan ti naimuntar a CCTV iti asideg ti Frank Burger House a masarakan iti Barangay 1, Vigan City.

Sakbayna, nagreport ni Bernadeth Buccat Orolfo, 32, naasawaan, sales lady, ken residente iti Barangay Dungalo, San Ildefonso, Ilocos Sur a natakawan iti selpon ken naglakuanna idi parbangon ti Enero 26.

Iti pulong ni Buccat iti polis, natakaw ti selponna a Mobile King ken naglakuanna a P9,000.00 iti mismo nga uneg ti Frank Burger House ket pattapatta a naisayangkat ti panagtakaw kadagitoy iti nagbaetan ti 3:20 a.m. agingga iti 4:00 a.m. ti nadakamat a petsa.

Segun ken ni Buccat, inkabilna ti selponna ken naglakuanna manipud idi Enero 24 iti sling bagna sana inridep iti uneg ti paglakuan.
Idi makariing, awanen ti bagna ket mapapati nga intaray dagiti di nabigbig a suspek.

Ngem idi mapagsaludsodan ni Buccat, nakunana nga idi pimmanaw ti lalaki a kaudian a kustomerna, nasiputanna daytoy a nagpadaya.#