Footer

3 motorista, natay iti nagsisina nga aksidente

CANDON CITY – Tallo a motorista ti natay idi nainbolbar ti luganda iti nagsisina nga aksidente a napasamak sadiay Narvacan, Santa, ken daytoy a siudad idi Enero 23 ken 24.

Idi agarup 10:30 ti rabii ti Enero 23, nainbolbar ti maysa nga Isuzu 10-wheeler truck ken maysa nga Apache motorcycle iti aksidente iti kalsada a sakup ti Barangay San Jose, Narvacan.

Kas maibatay iti report, kinuna ni D-Jay Malaque y Madamba, 27, awanan asawa, ken residente iti Barangay 22, Bani, Bacarra, Ilocos Norte, nga iparparkingna ti minanehona nga Isuzu 10-wheeler truck idi dinungpar ti Apache motorcycle a minaneho ni Jomar Cacpal y Brea, 27, awanan asawa, mannalon, ken residente iti Barangay Dasay, Narvacan, Ilocos Sur.

Naitaray ni Cacpal iti Ilocos Sur District Hospital, Narvacan ngem indeklara ti nangtaming kenkuana a doktor a dead on arrival.

Nakaro ti pannakadadael ti sungo ti motorsiklo idinto a nagsagrap iti pannakadadael ti makannigid a paset ti truck gapu iti pigsa ti impact.

Iti sabali pay a report, idi malem ti Enero 24, pimmusay iti ospital a nakaitarayanna ti maysa a motorista kalpasan a dinungpar ti luganna ti dua pay a motorsiklo sadiay Barangay Labut Norte, Santa, Ilocos Sur.

Pimmusay iti Metro Vigan Cooperative Hospital a nakaitarayanna ni Danny Garcia y Tolentino, 50, naasawaan, ken residente iti Barangay Bucalag, Santa, Ilocos Sur.

Naiyospital met iti nasao nga ospital ti drayber ti Mio Sport a ni Jushua Patrick Buenio y Burgonio, 25, awanan asawa, ken residente iti Barangay Cabangaran, Santa, Ilocos Sur; ti drayber ti Haojie motorcycle a ni Miguel Tacay y Baltazar, 18, baro, residente iti Barangay Pandan, Caoayan, Ilocos Sur, ken ti insakayna a ni Justine Andallo y Llanes, 20, awanan asawa, ken residente iti Don Alejandro Quirolgico, Caoayan, Ilocos Sur.

Segun dagiti saksi a dida kayat ti painaganan, agpaamianan a direksion ti MIO Sport ken Haojie motorcycle idi kimmaut iti liniada ti kasabatda a Euro motorcycle a nagresulta iti panangdungpar ti Euro kadagiti dua a lugan.

Intaray dagiti nagresponde a polis dagiti nainbolbar iti aksidente iti Metro Vigan Cooperative Hospital ngem naideklara idi agarup 6:31 ti malem ni Garcia.

Iti mismo a sanguanan ti Centrum Gasoline Station sadiay Barangay Bagani Campo, ditoy siudad ti nakapasamakan ti aksidente a nakainbolbaran ti maysa a motorsiklo ken Isuzu trailer truck idi agarup 1:00 ti parbangon ti Enero 24.

Segun iti report, imparking ni Isabelo Macabugao Viernes, 60, naasawaan, ken residente iti Quirino, Apayao ti luganna nga Isuzu trailer truck tapno gumatang iti sigarilio idi kellaat a dinungpar ti Honda XRM ti kutit ti lugan.
Gapu iti pigsa ti pannungpar, nagsagrap ti biktima a nainaganan idi agangay a maysa a Mark Anthony Delos Santos Sipin, 25, addaan asawa, ken residente iti Bigbiga, Santiago, Ilocos Sur ket nupay naitaray iti Saint Martin Hospital, Candon City, saanen a naikagud ti biagna.

Nadadael ti makannigid a paset ti akinlikud a bumper ti trailer truck idinto a nakaro ti dadael iti sungo ti motorsiklo.#

Comments are closed.