Footer

Bay-am nga Ayatenka iti Panagsagabak

Sarita ni Arnold M. Reyes
(Umuna a paset)

ADDAAKON iti maikatlo a tukad ti Mechanical Engineering idi maaksidente dagiti dadakkelko. Adda sangkabassit a sanikua a napanawanda ngem di umanay a busbosek agingga iti makaturposak.

Gapu ta nasged ti tarigagay a makaadal immakarak iti nalaka a pagdagusan. Siak ti aglaba ken agluto. Ngem uray kasano a panaginutko, in-inut a naibus ti iduldulinko. Iti sumuno a semestre, kapi-litan nga immallatiwak iti para rabii a klase. Nagsapulak iti trabaho iti aldaw.

Iti dayta a malem, dimmagasak nga agkape iti Espressjo Cafe, pangiliwliwagak iti bannog ken pannakaupayko a nagsapul iti trabaho. Kiwkiwarek ti kapek idi sumrek ti dua a nalapsat a babbai. Napno dagiti lamisaan ket immasidegda iti yanko.

“Mabalin ti makikatugaw, kuya?” sinaludsod ti nataytayag.

“Sige,” nakunak.

Nagtugaw ken indissoda dagiti nabungon a ginatangda iti lamisaan. Nagbilin ti nataytayag iti mainum.

“Saan met ngata a dakes no makiam-ammoak kadakayo,” kinunak.

Immisem ti nataytayag.

“Carlos ti naganko, Carlos Marquez.”

Nagkuretret ti mugingna. “Saan a kabarbaro ti naganmo kaniak, a. Taga-Viganka, ania?”

“Wen. Kasano nga am-mom?”

“Dinak kadi malasin? Siak ni Eliza… Eliza de los Santos.”

Minatmatak. Diak malagip no sadino ti nagam-ammuanmi.

“Malagipmo ‘di ubing a kanayon a sutilem idi agbasbasatayo idiay Vigan Central School? Siak daydi.” Nagkatawa ni Eliza ket nagparang ti sawsaway a kallidna.

Naisursurotak a nagkatawa. Malagipkon. Isu daydi nakuttong, agbutbuteg ken sursisursir ti pagan-anayna nga ubing a magustuak a sutilen. Agkaedadkami ngem dikami nagkaklasean. Addaak iti Section A idinto a Section C ti yanna.

“Dispensarennak ta dika nailasin,” nakunak. “Nabayag daydin… ken adun ti namalbaliwam. Baka ibagam a bolbolaenka ngem adun ti atiwem nga artista.”

Nagparang manen ti sawsaway a kallid ni Eliza a nangparimrim kaniak. “Hep, dimon ituloy amangan no mamatiak iti ibagbagam,” inkatawana.

Inyam-ammo ni Eliza ni Raquel a kaduana.

“Ket, komusta?” inamad ni Eliza kalpasanna.

“Rigat la ti adda,” insungbatko. Imbagak ti pannakaaksidente da Papang ken Mamang ken ti parikutko a mangituloy iti panagadalko. “Panagkitak ket dakkelen ti dimmur-asam iti biag,” intuloyko. “Napintas siguro ti pagsapulam.”

“Sekretariaak laeng iti Brodett & Sons,” kinuna ni Eliza.

“Taltalekmo pay,” kinunak. “Awan la ti bakante iti opisinayo? Uray dianitor.”

“Adda selponmo? Itedmo kaniak ti phone numbermo tapno ammok ti pangtawagak kenka no adda bakante,” kinuna ni Eliza.

IMPUSOTKO ti nautoyan a bagik iti kayo a tugaw. Kasangsangpetko a nagsapul iti trabaho ngem pasig nga awan ti bakante.

Kasano daytoyen, nakunak iti nakemko. Kinontarko ti nabatbati pay a kuartak. Saannan a maabut iti maka-awas pay.

Natugtog ti ridaw. Timmakderak ket napanko inlukat. Ni Eliza.

“Nairana nga adda pinasiarko dita Blumentritt,” kinunana. “Asideg met laengen ti kaseram ket napanu-notko ti dumagas. Ania, adda trabahomon?”

“Awan latta ti gasat. Pappapanawendak payen ditoy ta dua a bulanen a diak makabayad.”

Nagpanunot ni Eliza. Idi kuan, kinunana: “Adda sangkabassit nga urnongko. Sublatem pay laeng.”

“Kababain kenka. Awan pay pagsapulak. Diak maikari a mabayadanka a sigida.”

“Bayadamto no adda pagsapulam. Makabirokkanto iti panggedam,” kinuna ni Eliza.

“Eliza, apay a kasta ti panangisakitmo kaniak?” namatmatak ti balasang.

“Masiribka, Carlos. Makitak ti nasged a tarigagaymo a makaturpos. Sayangka no dimo matuloy ti adalmo. Sapay no di adu ti nangipadto idi agturpostayo iti elementaria a naraniagto ti masa-bayam.”

Ti tao no malipit, kumpet uray iti patadem. Inkidemko ti bainko ket inawatko ti intanggaya ni Eliza a tulong.

Binayadak ti kaserak. Nagasat sa daydi isasarungkar ni Eliza ta iti kabigatanna, nakastrekak a klerk iti maysa nga opisina. Nababa ti sueldo ngem no agin-inutak, maiyanayko iti inaldaw a masapulko ken iti panagadalko.

Idi nagsueldoak, napanunotko a sarungkaran ni Eliza tapno iblo-awtko uray iti nalaka laeng a panganan. Ngem imbaga ti nagsaludsodak a guardia nga awan ti empleadoda nga Eliza de los Santos.

Tinawagak ni Eliza iti selpon ngem nupay agkiriring, awan ti simmungbat. Idi timmawag kaniak, imbagana a diak tawtawagan ta maiparit iti opisinada ti makitsismis iti selpon wenno telepono. Imbagana a nagikkat iti dati pagtrabahuanna ket sabalin ti pagopisinaanna.

(Maigibusto)