Footer

Budol-Budol Gang, nangbiktima menor de edad

VIGAN CITY – Ballaag kadagiti menor de edad: saankayo nga agtalek a dagus kadagiti ganggannaet a manggayyem kadakayo amangan no kamengda iti grupo ti Budol-Budol Gang a nangbiktima kadagiti sumagmamano a residente ditoy probinsia iti kallabes.

Idi malem ti Enero 24, nagpulong iti polis da Jasmine Quinsay Noriega, 12, ken Hannah Jeane Quinsay Jarata, 12, agpada a Grade 7 ken residente iti Brgy. Camangaan, nga inallilaw ida ti dua a babai a puon ti nakapukawanda iti selpon, Ipod Apple ken Cellular keypad.

Segun kadagiti biktima, inasitgan ida dagiti suspek iti sanguanan ti Novo Building a masarakan iti Barangy 1, Vigan City ket nakipatpatang dagitoy kadakuada.

Naallukoy dagiti suspek dagiti biktima a temporario nga itedda ti Ipod Apple nga agbalor iti P30,000.00, Cellular Phone Samsung Ace 2 nga aggatad iti P5,000.00 ken Cellular Phone Keypad nga agbalor iti P700.00 kas sandi ti P68,000.00 a naikabil iti paper bag.

Kalpasan a naggiinnallawatda, imbaga dagiti suspek nga agsasarakda iti Land Bank, Vigan City ket ditoy nga isublida dagiti gamit dagiti menor de edad.

Napan dagiti biktima iti Land Bank ngem awan a nakitada dagiti suspek. Nakakitada ketdi iti paper bag iti dayta a lugar ket binukbukitanda. Ngem anian a dismayada ta naglaon met gayam daytoy kadagiti nakarkartib a pagiwarnak.

Kalpasan a naireport kadagiti polis ti napasamak, nangiwayatda iti hot pursuit operation ngem saandan a nasapulan pay dagiti suspek.

Kabayatanna, nabigbig ti maysa kadagiti suspek a nangbiktima iti baket iti uneg ti maysa a fast food chain sadiay Candon City idi bigat ti Disiembre 23, 2015.

Binigbig ni Teresita Raquel y Gamboa, 60, balo, ken residente iti Barangay Poblacion, Banayoyo, Ilocos Sur babaen ti retrato nga imparang dagiti polis ni Rowena Valdez y Genese, 41, naasawaan, ken residente iti Barangay Bitas, Cabanatuan City, Nueva Ecija a maysa kadagiti nangballaibo kenkuana iti uneg ti Jolibee a nakapukawanna iti P14,000.00.

Maipalagip a kadua ni Valdez da Raquel Dela Cruz y Rimando, 37, naasawaan, ken residente iti Brgy. Tibong, San Fabian, Pangasinan, ken Glorie May Rimando y Genese, 25, awanan asawa, ken residente iti Sitio Bolo, Brgy. Pandan, Alaminos, Pangasinan, a nangbiktima ken ni Delia Cablayan Dauz, 74, retirada nga empleada, naasawaan, ken residente iti Barangay Becquez, Tagudin, Ilocos Sur idi Enero 9, 2015.

Nagpammarang ti grupo a negosiante ket inallukoyda ni Dauz a makisosio iti negosioda.

Manipud iti San Fernando City, kinuyog ti grupo ti baket a naggawid iti balayna sadiay Tagudin, Ilocos Sur a nanga-laanna iti kuentas ken wedding ringna. Nangiyaon pay ti baket iti kuartana nga agdagup iti P400,000.00 iti maysa a bangko iti Candon City para iti isosiona iti negosio.

Nupay kasta, naapput dagiti suspek iti checkpoint nga impasdek dagiti polis-Sudipen apaman a nakaawatda iti flash alarm manipud iti polis-Candon para iti pannakasaed ti lugan dagiti suspek a nangbiktima iti baket.

Napasubli met ti negosiante ti kuarta ken alahasna.

Idi Enero 9, karaman da Dela Cruz ken Rimando iti grupo ti tallo a babai ken dua a lalaki a nangballaibo ken ni Mariano Co y Chan, 83, negosiante ken residente iti Barangay Pantay Daya ket intarayda ti relona nga aggatad iti P300,000.00, kuentas nga agbalor iti P200,000.00 ken kuarta a P10,000.00.

Naipiskot dagiti suspek sadiay Barangay San Agustin kalpasan a kinamat ida dagiti police-Candon idi ginandatda ti aglibas iti checkpoint nga impasdek dagiti pannakabagi ti linteg iti sango ti Bagani Campo Cemetery a dandani nakaatalan ti dua a polis.

Napasubli ni Chan ti kuentasna ngem saan a nabirokan ti relona iti ummong dagiti nadumaduma a relo a mapapati a naggapu kadagiti nabiktima ti grupo.#

Comments are closed.