Footer

2 lugan, natakawan bayat Kannawidan Festival

BANTAY, Ilocos Sur – Pinanawanna ti motorsiklona a nakakandado iti sango ti pasdek ti Rotary Club sa napan iti Quirino Stadium nagbuya iti Kannawidan Festival ngem idi agsubli, nakurimesen ti bagna a naglaon iti kuarta, resibo ken registration papers ti luganna.

Idi agarup 10:31 ti rabii ti Pebrero 2, inreport ni Elvin Balauro y Buenafe, 24, baro, mekaniko, ken residente iti Barangay Bongtolan, Vigan City a natakaw ti body bagna nga inkabilna iti uneg ti compartment ti Honda XRM 125 a motorsiklona.

Nagkarga ti body bag iti P5,000.00, orihinal a resibo ken sertipiko ti rehistrasion ti motorsiklona, kinuna ni Balauro.

Iti panagimbestiga dagiti polis, imparking ni Balauro ti motorsiklona iti sango ti Rotary Club Office iti met laeng Quirino Boulevard sa simrek iti Quirino Stadium a napan nagbuya iti Kannawidan Festival.

Idi nagsubli ni Balauro tapno alaenna ti kuartana, naduktalanna laengen a naporsar a naluktan ti compartment ti luganna ket awanen ti body bag a naggianan ti kuartna ken dokumento ti luganna.

Iti panagpalutpot dagiti polis, sumagmamano a nakaistambay iti asideg ti lugan ti nagkuna a nakitada ti maysa a lalaki a nakaaruat iti diaket ti nagtugaw iti motorsiklo.

Daytoy ti maikadua a report ti panagtakaw iti nasao met laeng a lugar iti las-ud ti tallo nga aldaw ken bayat ti selebrasion ti Kannawidan Festival.

Idi agarup 1:00 ti bigat ti Enero 30, naireport a natakawan ti maysa a Hyundai Grace Grand Salon van a kukua ti maysa a Virgilio Cornel, Jr. y Tines a naiparking iti met la sango ti Rotary Club Office.

Segun ken ni Tines, 49, company driver ti USSC Western Union, ken residente iti Barangay Parola, Tagudin, Ilocos Sur, imparkingna ti luganna iti sango ti nadakamat a pasdek sada napan nagbuya iti Siglat Ylocandia Grand Finals ti Kannawidan Festival.

Idi nagsublida, nakalukaten ti sliding door ken makannigid a tawa ti van ket awanen ti shoulder bagna a naglaon iti walletna, Company ID card ti USSC Western Union, Unified ID card (SSS, Pag-Ibig, Philhealth); professional driver’s License nga inyisio ti LTO Candon Branch; ATM card para BDO; cellphone charger; USB; Philhealth ID card; Medicard ID; anteohos; dua a diaket ken sumurok-kumurang P6,000.00 a kuartana. Idi

Iti pannakaisurat daytoy, awan pay ti natiliw a suspek kadagitoy a panagtakaw. Ngem suspetsaen ti polis a maymaysa a tao ti nangisayangkat iti nagsina a panagtakaw.#

Comments are closed.