Footer

Biktima ti pammaltog, innagananna nanggandat iti biagna

CANDON CITY – Addan iti kustodia ti polis ditoy ti suspek iti pammaltog a naisayangkat sadiay Barangay Tamurong 1st, ditoy siudad idi rabii ti Pebrero 1.

Inaresto dagiti polis ni Rodrigo Gabor kalpasan nga intudo ni Wilfredo Tolentino y Galapate bayat ti pannakaitarayna iti ospital nga isu ti nangpaltog kenkuana iti daydi a rabii.

Kas maibatay iti police blotter, idi agarup 11:30 ti rabii ti Pebrero 1, nakaawat iti mensahe ni Tolentino ken maysa a Jodel Venus y Pascua, 34, residente met laeng iti nadakamat a barangay, manipud iti maysa nga Erwin Valdez a kalugaranda a nangawis kadakuada nga agpasiar iti piskeriana.

Nagkuyog da Tolentino ken Venus a nagturong iti fishpond ni Valdez ngem idi magmagnada nga agpaabagatan, nakangegda iti kanalbuong. Impasarang ni Tolentino ti lentena iti naggapuan ti kanalbuong ket nakitana ti gunman a nakaaruat iti camouflage ken bull cap.

Nagtaray ti biktima ngem kinamat ti gunman ken nagpaputok manen a nakapuntaan ti makannigid nga abaga ni Tolentino.

Nasarakan dagiti nagresponde a polis ti biktima sumurok kumurang 100 a metro ti kaadayona manipud iti nakapasamakan ti pammaltog ket intarayda iti Candon City Hospital para iti pannakataming ti sugatna.

Narekobre manipud iti crime scene ti dua a kapsula manipud iti cal. 5.56.

Nangiwayat ti kapolisan iti follow-up operation kalpasan nga innaganan ni Tolentino ti nangpaltog kenkuana ket inarestoda ti suspek iti balayna sadiay Barangay Villarica, Candon City idi agsapa ti Pebrero 2.

Kinuna ti polis a maipababaen ni Gabor iti paraffin test tapno maammuan no positibo ti imana iti pulbora.#