Footer

Indian national, hinold-ap 3 nagtagiarmas a lalaki

STA. LUCIA, Ilocos Sur – Maysa nga Indian national ti naireport a hinold-ap dagiti tallo nga armado a lalaki idi bigat ti Pebrero 3.

Kas maibatay iti report ni Ronda Barangay Captain Reynaldo Dinglasan iti polis ditoy, tallo a lalaki a nagaruat iti nangisit a tisirt nga adda markana a BID iti likud dagiti nanghold-ap iti Indian national a ni Rampreet Chumber, 33, naasawaan, ken agnaed iti Barangay San Antonio, Candon City.

Apaman a naawatda ti report, dagus a nagresponde dagiti polis iti panangidaulo ni Senior Inspector Ramil R. Mendioro, OIC, sada pinakaammuan dagiti police stations a kaparanget ti Sta. Lucia tapno maipasdek dagiti checkpoint iti posible a pagdaliasatan dagiti suspek ngem negatibo ti resultna.

Bayat ti panagpalutpot dagiti polis iti mapapati a nakapasamakan ti hold-ap, simmangpet ti biktima a naglugan iti traysikel ket pinatalgedanna ti report a nahold-ap.

Kinuna ni Chumber nga idi agarup 11:00 ti bigat ti nadakamat a petsa, bayat ti kaaddana iti tienda ni Vilma Pimentel y Ragunton tapno agkolekta iti pautangna, dua a di nabigbig a lalaki ti dimsaag manipud iti nalabaga a SUV ket inyam-amoda ti bagida a kas empleado ti BID sada binirok ti identification card ti Indian national.

Imbilin dagiti suspek ti ilulugan ni Chumber iti SUV ket idi addan ti Indian national iti uneg, nakitana nga adda pay kadua dagiti suspek nga armado.

Pinaturongan ti maysa kadagiti suspek iti paltog ni Chumber idinto nga indeklara dagiti kakaduana ti hold-ap.

Bayat ti panagdaliasat ti lugan nga agpa-Sta. Cruz, innala dagiti suspek ti kuarta ti biktima a P15,000.00, Seiko 5 a relo, drivere’s license ken selpon a Samsung.

Pinungo dagiti suspek ni Chumber babaen ti nylon cable ken kinalubanda dagiti matana babaen ti packaging tape.

Nawarwar ti biktima ti galutna ket nangpara iti traysikel a nangisubli kenkuana iti Barangay Ronda a nakahold-apanna.

Agtultuloy ti panagimbestiga dagiti polis mainaig iti nasao a hold-ap.#