Footer

BANNER: Droga, paltog, balbala, nakumpiska iti balay ti drug personality

MAGSINGAL, Ilocos Sur – Nakaeskor manen ti kapolisan iti kampaniana maikontra iti droga ken loose firearms kalpasan a nagpositibo ti search operation nga insayangkatda iti balay ti maysa kadagiti akusado iti pammaltog sadiay Sitio Baybayabas, Barangay Maas-asin ditoy nga ili idi parbangon ti Pebrero 9.

Nadegdegan ti kaso ni Alfredo Ullero y Racho, 52, naasawaan, mannalon, agsipud ta saan laeng a droga no di pay paltog ken balbala ti nakumpiska iti pagtaenganna iti nadakamat a search operation ti kapolisan.

Nakakumpiska dagiti operatiba iti balay ni Ullero iti maysa a Cal. 45 pistol NORINCO nga addaan serial no. BA32202-11-246 PA 11; maysa a magazine assembly para Cal .45; 5 a bala para Cal .45; 35 bala para Cal 5.56mm; 2 heat sealed plastic sachets a nagkarga iti mapapati a shabu; maysa a plastic sachet a nagkarga iti puraw a banag; improvised tooter; improvised scooper; getteng; ken narolio nga aluminum foil.

Imet dagiti operatiba ti Search Warrant No. 06-16 a pinirmaan ni Judge Mario S. Domingo ti MCTC, Magsingal-San Juan, Ilocos Sur a napetsaan Pebrero 5, 2016 idi insayangkatda ti panagsukisok iti balay ni Ullero.

Sumangsango ni Ullero iti kaso nga attempted murder nga addaan piansa a P120,000.00 ken frustrated murder nga addaan piansa a P200,000.00 a naipababaen iti Criminal Case Nos. 3030-K ken 3031-K nga inyisio ni Judge Nida Bringas Alejandro ti Regional Trial Court Branch 24, Cabugao, Ilocos Sur.

Nakalista pay ni Ullero kas Top 9 iti Sibat Target ti Magsingal police station.

Inaresto pay dagiti polis ni Delicio Ullero y Racho, 46, naasawaan, barangay councilman ken residente met laeng iti nadakamat a lugar babaen ti bileg ti arrest warrant nga inyisio ni Judge Alejandro mainaig dagiti kaso nga attempted ken frustrated murder a nakaikasuan ni Alfredo Ullero.

Naipan ni Alfredo Ullero ken dagiti nakumpiska iti balayna iti opisina ti CIDG idinto nga iti police station ti nakaipanan ni Delicio Ullero para iti umisu a dokumentasion ken disposision.#

Comments are closed.