Footer

Dati a barangay captain, napapatay

SALCEDO, Ilocos Sur – Maysa a dati a barangay captain ti napapatay bayat ti panaglutona iti bulong iti tabakona sadiay Barangay Lucbuban ditoy nga ili idi parbangon ti Pebrero 10,

Nainaganan ti biktima a ni Saturnino Lupato y Rubang, 47, naasawaan, mannalon, ken residente iti nadakamat a barangay.

Nasarakan dagiti immarayat a kaarrubana ni Lupato a nadigos iti bukodna a dara iti likud a paset ti balay ti maysa nga agnagan Garizel Bisoy nga adda iti asideg ti pugon a paglutlutuan ti biktima iti bulong ti tabakona.

Saan pay nga ammo no asino ti nangpapatay iti dati a barangay captain.

Segun ken ni Jaime Diasen y Calag-is, 36, kalugaran ti biktima, nakangegda iti sumagmamano a kanalbuong idi agarup 11:45 ti rabii ti Pebrero 9.

Napan da Diasen ken ti kabsatna a ni Jerwin iti balay ti kaarrubada a ni Bonifacio Sunio ket dinamagda no naggapuan ti kanalbuong.

Nagturong dagiti agkabsat a iti balay ni Lupato ngem awan daytoy isu a napanda kinita iti pugon a paglutlutuanna.

Nakita laengen ni Jaime ni Lupato a nakadalutaytay iti daga a nadigos iti bukodna a dara.

Naitaray ni Lupato iti Salcedo Medicare Hospital ngem naideklara nga awanen ti biagna gapu kadagiti sugatna a sinagrapna iti nadumaduma a paset ti bagina.

Iti panagimbestiga ti SOCO, Candon City nga indauluan ni Supt. Jose Wacangan, nakarekobreda iti innem a kapsula ti Cal. 45, 4 a kapsula manipud iti Calo. 5.56 mm ken maysa a deformed slug manipud iti cal. 45.

Agtultuloy ti panagimbestiga dagiti polis mainaig iti pammapatay.#