Footer

Drayber, konduktor, natay, 31 pasahero nadundunor iti aksidente ti lugan

SANTIAGO, Ilocos Sur – Nadadael a preno ken nagalis a kalsada ti naitudo a nakagapu iti pannakaidungpar ti dua a lugan sadiay Tagudin ken ditoy nga ili idi parbangon ti Pebrero 7 a nakatayan ti tallo a tattao ken nakayospitalan dagiti pinullo a pasahero.

Kinuna dagiti inbestigador a napasamak ti immuna nga aksidente iti pagkurbaan ti Tagudin Everlasting Memorial Garden a sakup ti Barangay Bimmanga, Tagudin idi agarup 12:30 ti bigat ti nadakamat a petsa no sadino a maysa a Ford Ranger a minaneho ni Reynaldo Laborera Ringor, 27, ken residente iti Barangay Sawat, Tagudin, Ilocos Sur, ti nangdungpar iti poste ti elektrisidad a puon ti nakatayanna ken pannakadundunor dagiti pasaherona.

Segun iti police blotter, agpaabagatan ti Ford Ranger ket idi makadanon iti nakapasamakan ti aksidente, napukaw ti preno ti lugan ket naawan ti kontrol ni Laborera iti manibela a nakagapu iti pannakadungparna iti poste ti elektrisidad ken nagpusiposan ti lugan.

Gapu iti pigsa ti pannungpar, nagsagaba kadagiti sugat iti nadumaduma a paset ti bagida dagiti nakalugan a pakaibilangan da Mark Ringor y Aguilan, 25, residente iti Brgy Jardin; Arvin Ringor Panganiban, 24; Marie Ester Laborera Ringor, 31; Jessica Laborera Ringor, 23, ken Mario Gascon Ringor, 54, naasawaan ken residenteda amin iti Brgy. Sawat, Tagudin, Ilocos Sur.

Naitaray dagiti biktima iti Ilocos Sur District Hospital, Barangay Bio, Tagudin, ngem naideklara nga awanen ti biag ni Mario Ringor.

Iti maikadua nga aksidente, dua a pinuon ti kayo ken maysa a balay sadiay Barangay Olo-olo Sur, ditoy nga ili ti dinungpar ti Fariñas Bus idi agarup 2:08 ti agsapa ti nadakamat met laeng a petsa a nakatayan ti drayber a ni Charlie Pastor y Afos, 36, naasawaan, ken residente Barangay Visaya, Vintar, Ilocos Norte ken ti konduktor a nainaganan Moses Tagaca y Respicio, 30, naasawaan ken residente iti Barangay 7, Bacarra, Ilocos Norte.

Agpada a naideklara a dead on arrival da Pastor ken ni Tagaca iti ospital a nakaitarayanda.

Segun iti inbestigasion, napukaw ni Pastor ti kontrolna iti manibela gapu iti nagalis a kalsada ket nagiwes ti lugan iti makannigid a linia sana dinungpar ti pinuon ti Gmelina ken inarado ti balay ti maysa a Ernesto Carranza y Gabres, dinarusdosna ti alad sana dinungpar ti pinuon a narra iti paraangan ni Pruvencio Palabay.

Iti kadagupan a 31 a nasugatan a pasahero a naitaray iti sumagmamano nga ospital iti Candon City a pakaibilangan ti Candon General Hospital, Tablac Candon City; St Martin De Porres Hospital; San Antonio Candon City; ken Candon City Hospital, San Nicolas, Candon City, 6 ti napagbati iti ospital gapu ta kasapulan ti naan-anay a pannakaobserbada.

Nabigbig dagiti pasiente a da Froilan De Los Santos y Paragua 26, residente iti Brgy. 46, Laoag City, Ilocos Norte; Rose Ann Pardo, 29, residente iti Gabu Airport, Laoag City, Ilocos Norte; Remidios Reyno y Santos, 50, residente iti Curimao, Ilocos Norte; Stephanie Marias y Sanchez, 27, resident of Navotas Laoag, Ilocos Norte; Sharmaine Sanchez y Tigno, 22, residente Victoria Village, Baguio City; ken Isagani Ladiente, 30, residente iti Bacarra, Ilocos Norte.#

Comments are closed.