Footer

BANNER: Akusado iti frustrated murder, napilaan iti kaso ti droga, panaglabsing iti Comelec gun ban

CABUGAO, Ilocos Sur -Tallo pay a kaso ti naiyuli iti korte maikontra iti maysa a mannalon nga akusado pay iti sumagmamano a kaso ta saan laeng a droga no di pay paltog ken balbala ti nakumpiska iti pagtaenganna iti search operation ti kapolisan idi parbangon ti Pebrero 9.

Napilaan ni Alfredo Ullero y Racho, 52, iti kaso a panaglabsing iti Seksion 11 ken 12 ti RA 9165 ken Seksion 28 iti RA 10591 babaen ti Criminal Case Nos. 3389-K, 3390-K and 3391-K.

Nairekomenda nga agpiansa iti P200,000.00, P60,000.00 ken P80,000.00, naipila dagiti kaso ni Ullero iti Regional Trial Court ti Cabugao, Ilocos Sur.

Nupay naruk-atan ni Ullero iti kustodia ti Magsingal Police Station kalpasan a nagpiansa iti P60,000.00 ken P100,000.00 mainaig iti immun-una a kasona nga attempted murder ken frustrated murder a naipila met laeng iti nadakamat a korte iti babaen ti Criminal Case Nos. 3030-K ken 3031-K, naipan iti provincial jail sadiay Barangay Taleb, Bantay, Ilocos Sur gapu kadagiti tallo a naud-udi a kaso a sanguenna.

Maipalagip nga idi sinukisok dagiti nagtipon nga elemento ti kapolisan a pakaibilangan ti CIDG ken Magsingal police station ti balay ni Ullero sadiay Sitio Baybayabas, Barangay Maas-asin, Magsingal, Ilocos Sur idi parbangon ti Pebrero 9, nakakumpiskada iti maysa a Cal. 45 pistol NORINCO nga addaan serial no. BA32202-11-246 PA 11; maysa a magazine assembly para Cal .45; 5 a bala para Cal .45; 35 bala para Cal 5.56mm; 2 heat sealed plastic sachets a nagkarga iti mapapati a shabu; maysa a plastic sachet a nagkarga iti puraw a banag; improvised tooter; improvised scooper; getteng; ken narolio nga aluminum foil.

Inaresto pay dagiti polis ni Delicio Ullero y Racho, 46, naasawaan, barangay council-man ken residente met laeng iti nadakamat a lugar babaen ti bileg ti arrest warrant nga inyisio ni Judge Alejandro mainaig dagiti kaso nga attempted ken frustrated murder a nakaikasuan ni Alfredo Ullero.

Kabayatanna, naiyendorson ti kaso a panaglabsing iti Comelec gun ban, RA 10591 ken Section 11 iti RA 9165 maikontra ken Wyatt Valenton y Bamba, a naaresto iti drug operation sadiay Barangay San Antonio, Candon City idi 12:30 ti agsapa ti Pebrero 16.

Segun iti polis, agdagsen amin ti nakumpiska a shabu ken ni Valenton iti .1350 grams.

Manamnama met a maawis nga agpalawag ni Raymundo Pilotin Bersalona, taga-26 km. 3 Asin Road Interior, Baguio City, gapu ta naduktalan dagiti polis a nairehistro kenkuana ti nakumpiska a paltog manipud ken ni Valenton a maysa a cal. 45 Armscor M1911 pistol.

Nagpaso ti paltog idi Oktubre 28, 2013. #