Footer

Menor de edad, imbuking ti alarm system a nagsikuat iti kuarta

VIGAN CITY – Sabali pay nga establisimiento ti natakawan ditoy siudad uppat nga aldaw kalpasan a naserrek ti dua a pasdek-negosio idi Pebrero 14.

Ngem iti daytoy a gundaway, akto a natiliw ti suspek a maysa a menor de edad kalpasan nga imbuking ti alarm system a nayinstolar iti uneg ti pasdek.

Innaganan ti polis ti suspek a ni Edmund Tapaya y Dela Cruz, 15, Grade 9 student, ken residente iti Barangay Bongtolan, Vigan City.

Segun ken ni Etrata Marquez, 68, naasawaan, negosiante ken residente iti Gen. Luna St., Barangay 1, Vigan City, nagsaruno a natakawan ti Dee’s Internet Cafe idi Pebrero 16 ken 17 a nakapukawan ti P2,070.00 a koleksionda ket mapapati a ti met laeng suspek ti nangisayangkat iti panagtakaw.

Iti panagimbestiga dagiti polis, simrek ni Tapaya iti internet cafe ket nagpammarang a kustomer. Idi nakaliway ti biktima, inalistuan ti suspek a kinurimes ti cash money a naikabil iti alud, ngem naguni ti nayinstolar nga alarm system a puon ti nakaawisan ti imatang ti biktima ket akto a nakitana ti suspek a nangtakaw iti kuarta.

Narekobre iti ikut ti suspek ti koleksion a kuarta a P1,100.00.

Agsipud ta menor de edad, naipaima ti suspek iti City Social Welfare Office.

Kabayatanna, natnag iti ima dagiti polis ti maysa a mannibrong kalpasan a nabuking a nangtakaw iti selpon ti maysa a sales lady iti Houxing Enterprises a masarakan iti Barangay VIII, Vigan City idi bigat ti Pebrero 14.

Nabigbig ti suspek a maysa nga Aldwin Tongson Patawaran, 35, awanan asawa ken residente iti Barangay Cabalangegan, Vigan City.

Kas maibatay iti testimonia ti biktima, simrek ti suspek iti establisimiento tapno aglako iti Huawei cellphone ngem saan a naasikaso dagiti tindera ta adu dagiti kustomer.

Ginundawayan ti suspek daytoy ket sinikuatna ti Samsung S3 a selpon nga agbalor iti P9,000.00 a kukua ni Nolasco.

Limtuad nga immun-una ngem daytoy, nagtakaw ti suspek iti Health and Wellness Spa a kukua ni Rhoda Agcamaran, naasawaan, ken residente iti Barangay Poblacion, Sto. Domingo idi agarup 12:55 ti rabii ti Pebrero 14.

Mapapati a simrek ti suspek iti nakalukat a ridaw ti establisimiento bayat ti panagdalus ti cashier sana sinikuat ti telepono a naikabil iti rabaw ti lamisaan ti cashier.

Naibuking ti suspek babaen ti CCTV a nayinstolar iti pasdek ket inaresto dagiti polis iti pagtaenganna.

Nupay narekobre iti balay ti suspek ti naireport a natakaw a telepono ti Health and Wellness Spa, saandan a nasarakan ti selpon ni Nolasco a mapapati a nailakon ti suspek.#

Comments are closed.