Footer

P50-M pategna mula a marihuana, napag-ot, napuoran iti 3 plantasion

SUGPON, Ilocos Sur – Agdagup iti agarup P50 million ti balor dagiti mula a marihuana a pinag-ot ken pinuoran dagiti nagtitipon nga elemento ti kapolisan iti tallo kadisso a plantasion daytoy maiparparit a mula sadiay Barangay Caoayan ken Licungan ditoy nga ili itay lawasna.

Iti report manipud ti polis-Sugpon, indissag ti helicopter dagiti operatiba manipud iti Sugpon municipal police station, Ilocos Sur PAIDSOTG, PDEA RO1, PIB, RIU, RID, RPSB, Philippine Air Force ken Philippine Army iti helicopter sadiay Santol, La Union sada simmang-at iti nadakamat a barangay tapno isayangkatda ti marihuana eradication.

Uppat nga aldaw daytoy nga operasion nga inwayat dagiti elemento ti kapolisan.

Segun iti report, nagkatlo a grupo dagiti operatiba ket tallo lugar ti nagpag-otanda kadagiti mula a marihuana: iti Sitio Nava, Barangay Caoayan, Sugpon a nakapag-otan ti 113,895 a fully grown a mula a marihuana; iti Mount Bato, Licungan, Sugpon a nakapag-otan iti 33,600 a full grown a mula a marihuana ken iti Mount Banyakaw, Licungan, Sugpon a nakapag-otan ti 6,400 a mula ti marihuana nga addaan iti ka-dagupan a balor a P49,041,250.00.

Maysa nga agnagan iti Jomar Capucap y Cudlay, 27, awanan asawa, mapapati a mangtartaraken kadagiti mula a marihuana, ken residente iti Barangay Licungan, Sugpon ti inaresto dagiti operatiba.

Pinuoran dagiti polis dagiti mula a marihuana, bunubon ken ramramit iti panagta-raknan iti daytoy maiparparit a mula iti mismo a nagpag-otanda a plantasion.

Bimmaba dagiti tropa manipud iti nagpag-otanda a plantasion idi agarup 11:00 ti bigat ti Pebrero 15, 2016.

Nangibaba laeng dagiti polis iti sumagmamano a bungkos dagiti napag-ot a mula ti marihuana kas ebidensia idinto a naipan ni Capucap iti PDEA RO1 para iti umisu a disposision.

Sumagmamano nga operasion ti insayangkat ti kapolisan iti pagbeddengan ti Sugpon, Ilocos Sur, Benguet ken La Union iti kallabes no sadino a nagparut ken pinu- oranda dagiti mula a marihuana nga agbalor iti minilion a kantidad.#

Comments are closed.