Footer

Anggulo ti droga kitkitaen kapolisan nakagapu pammaltog

TAGUDIN, Ilocos Sur – Kitkitaen ti kapolisan ditoy no adda pakainaigan ti droga iti pannakagandat ti biag ti maysa a masuspetsa a drug personality sadiay Barangay Dardarat idi agsapa ti Pebrero 21.

Kas maibatay iti rekord ti polis ditoy, iti kallabes ket naipababaen ni Alvin Lorenzana y Cardenas, 31, naasawaan, ken residente iti nadakamat a barangay, iti drug watch list ditoy nga ili ken nakasuan iti panaglabsing iti RA 9165 ngem nawaswas ti kasona idi 2014.

Pinaltogan ti maysa a lalaki a naglugan iti nangisit ken puraw a Rusi motorcycle nga awanan iti plaka ken nakaaruat iti amarilio a sando, nangisit a iti amarilio a sando, nangisit a bonete ken bull cap ni Lorenzana bayat ti panagkapena iti sango ti balayda idi agarup 8:50 ti agsapa idi Pebrero 21.

Mapapati nga inasitgan ti di nabigbig a lalaki ni Lorenzana sana pinaltogan a nakatiruan ti makannigid a pingpingna (saan a kannawan a pingping kas immuna a naireport).

Nabaelan ti biktima ti nagtaray a simrek iti balayna idinto a naglibas ti suspek iti saan nga ammo a direksion a nakalugan iti motorsiklona.

Immuna a naitaray ni Lorenzana iti Ilocos Sur District Hospital, Bio, Tagudin sa naiyalis iti ITRMC, San Fernando City, La Union.

Iti follow-up investigation ti polis, maysa a deformed pellet a mapapati a naggapu iti bagi ti biktima ti inted ti kalib-inna a maysa a Rocel Lubdoy Saldua iti polis.

Iti met panagpalutpot ti SOCO Candon City iti nakapasamakan ti krimen, nakasarakda iti tallo a deformed pellets, ken plastic ken paper wads.

Agtultuloy ti panagimbestiga dagiti polis mainaig iti nasao a pammaltog.#

Comments are closed.