Footer

P12-M pategna a puon ti marihuana, napag-ot iti 18 a plantasion

CAMP BGEN OSCAR M FLORENDO – Agbalor iti nasurok P12 million dagiti pinuon ti marihuana a pinag-ot dagiti nagtitipon nga elemento ti kapolisan iti inwayatda nga operasion sadiay Santol, La Union idi lawasna.

Segun iti report manipud iti police provincial office ditoy, naiwayat ti dua nga aldaw a marihuana eradication idi Pebrero 24-25, babaen ti nagtitipon a puersa ti Santol Police Station, La Union Police Public Safety Company (LUPPSC) ken ti Philippine Drug Enforcement Agency-Regional Office 1 ((PDEA-RO1).

Kinuna ni Police Chieft Supt. Ericson T. Velasquez, Regional Director of Police Regional Office 1, nga agdagup iti 93,200 a mula a marihuana nga iti pammattapatta ti Dangerous Drug Board (DDB) ket agbalor iti P12,109,000.00 ti pinag-ot dagiti operatiba iti 18 a plantasion iti kabambantayan a paset ti Sasaba ken Sapdaan, agpada a barangay ti ili a Santol.

Kas maibasar iti report, 15 a plantasion sadiay Sapdaan ti nagparutan dagiti polis iti sumurok-kumurang 79,800.00 a fully grown a mula a marihuana idinto a 13,400 a mula a marihuana ti nadadael iti tallo a plantasion iti Sasaba.

Pinuoran dagiti polis dagiti napag-ot a mula a marihuana agraman dagiti ramit iti talon idinto a nangibabada laeng kadagiti sumagmamano a bungkos para iti dokumentasion ken umisu a disposision iti PDEA RO1.

Kabayatanna, naipaiman ti maysa a mannalon a natiliw nga agtartaraken kadagiti maiparparit a mula a marihuana iti Bureau of Jail Management Penology kas maibatay iti commitment order nga inyisio ti judge ti korte ti Tagudin, Ilocos Sur.

Napilaan iti kaso ni Lucinio Del-amen y Comot, 18, baro, mannalon, ken residente iti Sitio Liblibo, Barangay Kayapa, Bakun, Benguet gapu iti panaglabsingna iti Comelec gun ban ken iti RA 9165.

Maipalagip nga idi 12:10 ti bigat ti Pebrero 19, 2016, nangiwayat ti kapolisan iti operasion iti nagbeddengan ti Sugpon, Ilocos Sur ken Barangay Kayapa, Bakun, Benguet, partikular iti Mount Saleng ket pinag-otda dagiti mula a marihuana iti tallo a plantasion.

Nakumpiska pay iti maysa a cal. 22 rifle nga addaan iti improvised a magasin a nagkarga iti dua a bala manipud ken ni Del-amen.

Immun-una ngem daytoy, nangiwayat ti kapolisan manipud iti Ilocos Sur PAIDSOTG, PDEA RO1, PIB, RIU, RID, RPSB, Philippine Air Force ken Philippine Army iti uppat nga aldaw marijuana eradication sadiay Barangay Caoayan ken Licungan, Sugpon, Ilocos Sur.

Nagkatlo a grupo dagiti operatiba ket tallo lugar ti nagpag-otanda kadagiti mula a marihuana: iti Sitio Nava, Barangay Caoayan, Sugpon a nakapag-otan ti 113,895 a fully grown a mula a marihuana; iti Mount Bato, Licungan, Sugpon a nakapag-otan iti 33,600 a full grown a mula a marihuana ken iti Mount Banyakaw, Licungan, Sugpon a nakapag-otan ti 6,400 a mula ti marihuana nga addaan iti kadagupan a balor a P49,041,250.00.

Maysa nga agnagan iti Jomar Capucap y Cudlay, 27, awanan asawa, mapapati a mangtartaraken kadagiti mula a marihuana, ken residente iti Barangay Licungan, Sugpon ti inaresto dagiti operatiba.
Kinuna ni Velasquez nga agtultuloy nga agisayangkatda kadagiti operasion maikontra iti droga ken panagdadael kadagiti plantasion ti marihuana tapno maikkatan wenno mapugipog ti panagraira ti illegal droga iti rehion.#