Footer

BANNER: 10 police officers, naisaklang iti panagtakaw

TAGUDIN, Ilocos Sur – Sangapulo a polis a paka-iramanan ti dadauloda ti naisaklang iti opisina ni Associate Provincial Prosecutor Arceli Perla Y. Rebollido-Refuerzo mainaig iti mapapati a panangrautda iti balay ti dua a mannalon sada kinurimes ti selpon dagitoy idi aldaw ti Pebrero 27, 2106.

Naisaklang iti kaso a panagtakaw da PSI James Domansi Acod ken siam pay a John Does a mapapati a polis amin iti Kibungan Municipal Police Station, Kibungan, Benguet.

Iti report manipud iti Sugpon Municipal Police Station, nagpulong da Eddie Pal-iwen y Capucap, 31, awanan aasawa, mannalon, ken residente iti Sitio Tambol, Barangay Danac, ken Jose Taypew y Velasco, 33, awanan asawa, mannalon, ken residente iti Sitio Salicocong, Barangay Licungan, a sinerrek ti grupo ti armado a polis ken police officers a mapapati a kameng ti Kibungan Municipal Police Station, Kibungan, Benguet nga indauluan ti maysa a PSI James Domansi Acod ti balayda idi parbangon ti Pebrero 19.

Segun ken ni Pal-iwen, linawlaw dagiti polis ti balayna idinto a nagtugtog iti ridaw dagiti dadduma sada pinukkawan ti naganna ken ti inaudi a kabsatna a ni Rogelio a saanda nga imbatad ti panggep ken kinasiasinoda.

Idi awan ti nanglukat iti ridaw wenno simmungbat iti pukkawda, nangipasanggir dagiti polis iti improvised a kayo nga agdan ket daytoy ti inaramatda a simrek iti nakalukat a tawa.

Gapu iti daytoy, timmapuak Gapu iti daytoy, timmapuak ni Pal-iwen iti sabali a tawa sa nagtaray nga immadayo iti saan nga ammo a direksion agingga a naikaruskos iti maysa a rangkis a nakaigapuan ti panag-sagrapna kadagiti garadgad iti nadumaduma a paset ti bagina.

Mapapati a dinadael pay dagiti polis ti atep ti balay ti biktima sada binurak ti sarming a tawa ken innalada dagiti tallo a units ti selpon nga adda iti uneg ti balay a pakaibilangan ti Samsung 1200y, SKK K99 ken SKK K18.

Segun iti report, sa la pimmanaw dagiti polis idi agarup 7:30 ti agsapa iti dayta met la a petsa sada napan iti Sitio Salicocong, Barangay Licungan, Sugpon ket ditoy a sinerrekda met ti balay ni Taypew nga awan ti pammalubosna sada sinukisok ti balay gapu ta akusasion nga adda inlemmeng ken ikut daytoy a paltog.

Nagsardeng laeng a nagsukisok dagiti polis idi binirok ti kabsat ni Taypew a ni Rosencio, mannalon met laeng, ti iggemda a search warrant.

Kinuna ni Taypew nga imballaag pay dagiti polis a puoranda amin a balbalay iti Sitio Salicocong, Barangay Licungan ken abutanda ti bagi ni Jose Taypew no agsublida.

Iti pannakaisurat daytoy, naipaiman ti reklamo da Pal-iwen ken Taypew a panaglabsing iti Article 128 ti Revised Penal Code wenno violation of domicile committed by a public officer wenno empleado maikontra kadagiti police officers.#