Footer

EDITORIAL: Ti politika ditoy pagilian

Ditoy pagilian, maibilang ti politika a maysa kadagiti kangrunaan a paset ti biag dagiti umili. Pammaneknek daytoy ti assideg a panawen a pannakaangay ti eleksion tapno maibutos dagiti agngayangay kadagiti puesto, iti man nasional wenno lokal a pursto.

Iti puesto ti presidente ken bise presidente, mabutosan tunggal innem a tawen. Saan a mabalin ti presidente ti agpailayon manen. Kunada ngamin nga atiddog unay ti innem a tawen para iti rinuker a presidente ngem bassit unay para iti nasayaat ken makabael a presidente. (Makabaelda amin ngem nasigsiglat ti maysa no sikap ti pagsasaritaan)

Iti kinasenador, adda dagiti innem a tawen ti panagtakemda idinto a tallo laeng a tawen dagiti dadduma. Isu a dagiti senador nga agtakem laeng iti tallo a tawen ket di pay bimmara no ar-arigen ti panagtugawda ngem nakatuonen ti imatangda iti panagpailayonda.

Kasta met iti lokal nga eleksion, tallo laeng a tawen ti terminoda. Agturposdan kalpasan ti tallo nga agsasaganad a pannakaibutosda. Isu a kaadduanna ti agkandidato iti nabbababa a puesto tapno mataginayonda wenno iduronda ti anakda, asawada, wenno asideg a kabagianda a mangsukat kadakuada tapno saan a mapugsat wenno margaay ti pundasion ti bilegda iti politika.

Kasta met nga agaama, aggiina, agkakabagian ti mangituray kadagiti barangay. Apay nga ipasublat iti sabali ti rienda ti turay ta kabaelan(?) met ti asawa wenno anakda?

Daytoy ti kangrunaan a gapu a nagtubo a kasla uong dagiti dinastia politikal iti iti nasional, probinsia, siudad wenno ili.

No patien dagiti politiko, saan a dinastia dayta. Serbisio publiko, kunada. Ta apay ketdin a pengdanda ti pamiliada no “nasged ti tarigagayda” nga agserbi kadagiti kabarangayanda?

Kapaliiwan nga iti daytoy nga eleksion, isu met la nga isu ti eleksion iti kallabes. No adda nagbaliwanna, dagiti laeng nagan. Ngem uray dagiti rupa ket kaadduanna a dagiti met la politiko iti kallabes, dagitoy respetado, mararaem, matangtangad a tattao nga ad-adda a bimmileg iti pannakalapgis dagiti panawen gapu iti kinasiglatda a sumala iti nadumaduma a tokar tapno makapagtalinaedda iti puestoda. Dagitoy a rupa ti manamnama nga agpayagpagto latta iti masakbayan, ket uray dagiti karungsotan a bagyo, layus, ginggined ket didanto kabaelan dagitoy a rippuogen wenno dupraken.

Isuda dagiti makunkuna a political survivors!

Quo vadis, Pilipinas?

Comments are closed.