Footer

Naiwalang a drug personality, binigbig ti asawana

STO. DOMINGO, Ilocos Sur – Nabigbigen ti lalaki a nasarakan a naiwalang iti Barangay Sta. Cruz, ditoy nga ili idi agsapa ti Marso 2.

Nabigbig ti biktima a maysa a John Paul Emmanuel Ramos y Garcia, 37, naasawaan, ken residente iti Gomez Street, Barangay 7, Vigan City babaen iti asawana a ni Marie Grace Frances Ramos y Macapagal, 36, negosiante, ken agnaed iti Zone 5, Bantay, Ilocos Sur.

Segun iti polis, adda ti biktima iti babaen ti watch list ken nakalista a numero tres a drug personality iti Vigan City police station

Maysa a Joey Medrano y Batoon, 43, naasawaan, drayber ti dyipni ken residente iti Barangay Sta. Cruz, Sto. Domingo, ti nangireport iti polis station a nalabsanna ti biktima a naidasay a daradara iti igid ti dalan a sakup ti lugarda bayat ti panagdaliasatna nga aggawid.

Intaray dagiti nagresponde a polis ni Ramos iti Tolentino Clinic and Hospital, Sto. Domingo, ngem indeklara ti doktor a nangtaming kenkuana a dead on arrival.

Iti panagpalutpot dagiti kameng ti SOCO, Ilocos Sur PPO team, nakarekobreda iti maysa a kapsula manipud iti Cal. 45 iti nakapasamakan ti krimen.

Saan pay nga ammo ti motibo ti pammapatay nupay kitkitaen dagiti inbestigador no adda pakainaigan iti droga ti krimen.#