Footer

Nangballaibo iti estudiante, inaresto ti polis

VIGAN CITY – Nagpullo ti maysa nga estapador kalpasan a kinemmeg dagiti polis ditoy babaen ti entrapment operation nga inwayatda iti terminal dagiti minibus ken dyipni ditoy siudad itay nabiit.

Inaresto dagiti elemento ti Vigan City Police Station ni Jay-r Villarin Silvestre, 25, awanan asawa, ken residente iti Sitio Cadre, Barangay Tamag, Vigan City kalpasan a nagpositibo ti entrampment operation nga inwayatda maikontra iti daytoy idi agarup 12:50 ti parbangon ti Marso 1, sadiay Vigan City Annex Terminal, Barangay VIII, ditoy siudad idi agarup 12:50 ti parbangon ti Marso 1, sadiay Vigan City Annex Terminal, Barangay VIII.

Nakumpiska pay dagiti operatiba ti P5,000.00 a marked money a pinangpalab-ogda iti suspek.

Kas maibatay iti pulong ni Dave Louie Bautista Parilla, 17, second year student, ken residente iti Barangay Bulag East, Bantay, Ilocos Sur, rinugian a biniktima ni Villarin idi pay Enero daytoy a tawen ngem sana laeng inreport daytoy idi Pebrero 28, 2016.

Idi Enero 2015, nagkasapulan ni Bautista iti teknisian a manglukat iti gamitna nga Iphone 5C, ket inyawatna ken ni Villarin a naam-ammona iti Facebook.

Napamati ni Villarin ni Bautista nga indeliber ti Iphone 5C iti maysa a Jonathan Velasco sadiay Manila.

Babaen ti komunikasionda iti selpon, naballaibo pay ni Villarin ti biktima a mangipaw-it iti kuarta a P12,000.00; Netbook Asus nga agbalor iti P25,000.00; 3 a balitok a kuentas nga agbalor iti P120,000.00; maysa a balitok a bracelet nga agpateg iti P36,000.00; ken maysa a balitok a singsing nga agbalor iti P30,000.00.

Kinuna ti polis a babaen ti pammilin ni Villarin, inted ni Bautista dagiti alahasna iti maysa a Vincent Maig, sabali pay nga alias nga inaramat ti suspek.

Kalpasan ti entrapment operation, nangiwayat ti kapolisan iti follow-up operation iti Cebuana Lhuiller Pawnshop a masarakan iti Del Pilar St., Brgy III ken Jose Singson St., Brgy VIII, Vigan City ket ditoy a naduktalanda a naisalda dagiti alahas iti nasao nga establisimiento.

Agtultuloy ti panagimbestiga dagiti polis no adda pay dagiti sabali a biniktima ni Villarin ditoy siudad wenno iti kaparangetna nga ili.#

Comments are closed.